جاقىندا عانا پاۆلودار وبلىسى، شارباقتى اۋدانى، جىلىبۇلاق اۋىلىنداعى مارالدى كولىندە اتىس بولعانىن جازعان بولاتىنبىز. جەرگىلىكتى بەس تۇرعىن جارالانعان. كەۋدەلەرىن رەزەڭكە وق تەسكەن تۇرعىندار دارىگەرگە قارالىپ، پوليتسياعا ارىز جازعان. تۇرعىندارعا قارۋ قولدانعان سول كولدى كۇزەتكەن كۇزەت فيرماسىنىڭ قىزمەتكەرلەرى ەكەن. تۇرعىنداردىڭ ايتۋىنشا، وقيعا ورنىندا پوليتسيالار دا بولعان. بىراق، ەشكىمدى تۇتقىنداماعان. "ەندى تۇرعىنداردى اتقاندار دا، تۇرعىندار دا جاۋاپقا تارتىلاتىن بولادى" دەدى پاۆلودار وبلىستىق پوليتسيا دەپارتامەنتى باستىعىنىڭ ورىنباسارى مۇراتجان شاكەروۆ.
"جەكە مەنشىك كۇزەت مەكەمەسىنە قاتىستى قىلمىستىق زاڭنىڭ 252-ءشى بابى بويىنشا قىلمىستىق ءىس قوزعالدى. ياعني، ءوز وكىلەتتىكتەرىن اسىرا پايدالانىپ، تراۆماتيكالىق قارۋ قولدانعاندارى ءۇشىن ايىپتالادى. ال، ءوز بەتىنشە كۇش قولدانباق بولعان جەرگىلىكتى تۇرعىندار 389 باپ بويىنشا جاۋاپقا تارتىلادى" دەدى پوليتسيانىڭ ورىنباسارى.
مارالدى كولى رەسپۋبليكاداعى ەرەكشە كولدەردىڭ قاتارىندا. تۇزدى كولدىڭ باتپاعىنىڭ ءوزى كوپتەگەن مينەرالدارعا باي، ەمدىك قاسيەتكە يە. كولدەگى ارتەميا سالينا دەپ اتالاتىن قۇرتتىڭ قارا بازارداعى باعاسى وتە قىمبات. جەرگىلىكتى تۇرعىندار مەن ينۆەستورلاردىڭ اراسىنداعى توبەلەس پەن قاقتىعىس وسى قۇرتقا بايلانىستى بولىپ تۇر. ءبىر قىزىعى وسى قۇرتتى اۋلاۋعا بايلانىستى ەشكىمگە كۆوتا بەرىلمەگەن. بۇل تۋرالى پاۆلودار وبلىستىق پوليتسيا دەپارتامەنتىنىڭ باسشىسى امانتاي اۋباكىروۆ ايتتى.سوندا كولدى كىم كىمنەن كۇزەتىپ ءجۇر؟
اتىس بولاتىن كۇنى كۇندىز جىلى بۇلاق اۋىلىنىڭ تۇرعىنىن كولدەگى كۇزەتشىلەر ۇستايدى. تۇزدى كولدەن ارتەميا اۋلادىڭ دەپ. تۇرعىن بولسا مويىنداماعان. سوسىن، ونى ۇرىپ-سوعىپ، تراۆماتيكالىق تاپانشامەن اتقان. ارتىنان بوساتىپ، قويا بەرەدى. كەشكە جاقىن كول باسىنا اۋىل تۇرعىندارى جينالادى. سول جەردە ايقاي-شۋ باستالعانىمەن، توبەلەس بولمايدى. كۇزەتشىلەر بولسا بەس جىگىتتى اتىپ جاراقاتتاعان.
اۋىل تۇرعىندارى وسى كولدە قالاي ينۆەستورلار پايدا بولدى، سودان بەرى كول باسىنان ايقاي-شۋ كەتپەدى دەيدى. وسىدان ەكى اپتا بۇرىن وسى كولدە اۋىل تۇرعىندارى مەن كۇزەتشىلەر اراسىندا ۇلكەن توبەلەس بولىپ، پوليتسيانىڭ ارالاسۋىمەن ارەڭ باسىلعان بولاتىن. بۇگىن پاۆلودارعا، مارالدى كولىنە نۇر-سۇلتاننان ىشكى ىستەر مينيسترلىگىنىڭ ارنايى وكىلى بارىپ، تەكسەرىس جۇرگىزۋدە.
https://www.facebook.com/100008177013860/videos/2481589072123636/
https://www.facebook.com/100008177013860/videos/2481589642123579/
https://www.facebook.com/100008177013860/videos/2481590975456779/
"ادىرنا" ۇلتتىق پورتالى
