الماتى وبلىسى، ەڭبەكشىقازاق اۋدانى، شەلەك اۋىلىندا 900 وقۋشىعا ارناپ سالىنعان ءابدۋالي قايدار اتىنداعى جاڭا ورتا مەكتەپكە قاتىستى داۋ تۋىندادى، دەپ حابارلايدى "ادىرنا" ۇلتتىق پورتالى.
جاڭا مەكتەپتىڭ ماڭىندا 44 جىلدان بەرى جۇمىس ىستەپ تۇرعان ءاليا مولداعۇلوۆا اتىنداعى ورتا مەكتەپ مۇعالىمدەرى وقۋشىلاردىڭ جاڭا مەكتەپكە اعىلۋىنا بايلانىستى، ساعات سانىنىڭ ازايىپ، جۇمىسسىز قالۋ قاۋپىندە تۇرعاندارىن ايتىپ، جان-ايقايلارىن جەتكىزدى.
ەلۋ جىلعا جۋىق ۋاقىت ءبىلىم بەرگەن مەكتەپ ۇجىمى جۇمىسسىز قالۋ قاۋپىن ايتىپ، پرەزيدەنت قاسىم-جومارت توقاەۆقا ۇندەۋ جولداعان. كەيىننەن، جەلىگە جۇكتەلگەن ۆيدەونى وبلىستىق ءبىلىم ءبولىمى قىسىم كورسەتىپ وشىرتكىزىپ تاستاعان. ەندى سول ۇندەۋلەرى ءۇشىن كەشىرىم سۇراۋدى تالاپ ەتىپ جاتقاندارى دا ايتىلدى.
ء"اليا مولداعۇلوۆا اتىنداعى ورتا مەكتەپتە 89 مۇعالىم بەكىتىلدى. ونىڭ تورتەۋى بالا كۇتىمىندە. بيىلعى وقۋ جىلىندا وقۋشىلاردىڭ ازايۋىنا بايلانىستى ۇستازداردىڭ 50%-ى جۇمىسسىز قالۋ قاۋىپىندە تۇر. ءبىزدىڭ تالابىمىز مۇعالىمدەرىمىزدىڭ ساعات سانى ساقتالسىن. وقۋشىلارىمىزدى قابىلداۋىنا بەلگىلى ءبىر شەكتەۋ قويىلسىن نەمەسە ءابدۋالي قايدار اتىنداعى ورتا مەكتەپكە ۇجىممەن تولىق ءبىزدى كوشىرسىن" دەيدى مولداعۇلوۆا اتىنداعى ورتا مەكتەپ مۇعالىمدەرى.
ۇستازداردىڭ اۋدان مەن وبلىستىق ءبىلىم ءبولىمى باسقارماسىنىڭ تابالدىرىعىن توزدىرىپ، سۇراتىپ جاتقان تالاپ-ارىزدارىنا جاڭا مەكتەپ باسشىلىعىنان تىم از ساعات ۇسىنىلعان. بىرنەشە جىلدىق قىزمەت ىستەگەن مۇعالىمدەر ساعات سانىنىڭ مۇنشا ازايۋىنا الاڭداۋشىلىق ءبىلدىرىپ، ۇجىمداعى جالعىز باستى انالار مەن كوپ بالالى وتباسىلاردى اسىراۋشىلارعا بۇل جاعداي ءتىپتى اۋىر ءتيىپ وتىر دەيدى.
رەداكتسيا وبلىستىق ءبىلىم بولىمىنەن جاعدايعا قاتىستى جاۋاپ سۇراۋ ماقساتىندا حابارلاسقانىمەن بايلانىسقا شىعا المادى. ءمان-جاي تۋرالى الداعى ۋاقىتتا تاعى باياندالادى.
پوسموترەت ەتۋ پۋبليكاتسيۋ ۆ Instagram
