جامبىل وبلىسىندا 1 سىنىپقا 13 512 بالا ەلەكتروندى تۇردە تىركەلدى، دەپ حابارلايدى adyrna.kz ۇلتتىق پورتالى. بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا ءبىلىم باسقارماسىنىڭ باسشىسى راحيا تۇرماحانبەتوۆا مالىمدەدى.
راحيا سەيتبەكقىزىنىڭ ايتۋىنشا، وبلىستا بالاباقشاعا بالالاردى كەزەككە قويۋ مەن جولداما الۋ (edugarden.kz), مەكتەپكە 1سىنىپقا قابىلداۋ (eduschool.kz) جۇيەسى جولعا قويىلعان. بۇگىنگى كۇنى مەكتەپكە 1 سىنىپقا 13938 ەلەكتروندى ءوتىنىش بەرىلىپ، 13512 بالا قابىلداندى. مەكتەپكە دەيىنگى ءبىلىم مەكەمەلەرىنە 10703 بالاعا ەلەكتروندى جولداما بەرىلدى.
اتالمىش جۇيە اشىقتىقتى قامتاماسىز ەتەدى. سونداي-اق، ول تەحنيكالىق جانە كاسىپتىك ءبىلىم بەرۋ مەكەمەلەرىنە وقۋعا قابىلداۋ (zhambyltipo.kz) جۇيەسى 100% اۆتوماتتاندىرىلعانىن ايتتى. بۇدان بولەك باسقارما باسشىسى جاڭا وقۋ جىلىندا بىرنەشە مەكتەپ جاڭادان اشىلاتىنىن تىلگە تيەك ەتتى.
– بيىلعى جاڭا وقۋ جىلىندا 5 مەكتەپ پايدالانۋعا بەرىلەدى. ونىڭ بىرەۋى ءۇشاۋىسىمدى، بىرەۋى اپاتتى جانە ۇشەۋى ورىن تاپشىلىعى بار مەكتەپتىڭ ماسەلەسىن شەشەدى. قالعان 3 اپاتتى مەكتەپكە وبلىستىق بيۋدجەتتەن قارجى ءبولىندى، قۇرىلىسى بيىل باستالادى. سونداي-اق، 7 مەكتەپكە كۇردەلى جوندەۋ جۇمىستارى جۇرگىزىلىپ جاتىر. ونىڭ 6-ۋى جاڭا وقۋ جىلىندا اياقتالادى. ايتسە دە، شۋ اۋدانىنداعى م.اۋەزوۆ مەكتەبىنىڭ قۇرىلىسى قاراشاعا دەيىن جالعاسادى. وقۋ پروتسەسىنە كەدەرگى كەلتىرمەۋ شارالارى قابىلدانۋدا. بىردە-ءبىر بالا وقۋدان سىرت قالمايدى، – دەدى باسقارما باسشىسى.
راحيا سەيتبەكقىزىنىڭ ايتۋىنشا، وبلىستا 25528 ۇستاز وقۋشىلارعا زامان تالابىنا ساي سانالى تاربيە مەن ساپالى ءبىلىم بەرۋدە.
جاڭارتىلعان ءبىلىم بەرۋ مازمۇنىنا كوشەتىن 4,9,10 سىنىپتارعا ساباق بەرەتىن 5311 جامبىلدىق پەداگوگ جاڭا باعدارلاما اياسىندا بىلىكتىلىكتى ارتتىرۋ كۋرستارىنان ءوتتى. وتكەن وقۋ جىلىندا جۇمىسقا مىڭنان اسا جاس مامان قابىلدانسا، بۇگىنگى كۇنى 360 جاس ماماندى جۇمىسقا ورنالاستىرۋ جۇمىستارى جۇرگىزىلۋدە.
بۇدان بولەك، باسقارما باسشىسى وقۋلىقتارعا بولىنگەن قارجىنىڭ جەتكىلىكتى ەكەنىن مالىمدەدى. ياعني، 1 قىركۇيەككە دەيىن وقۋلىقتار 100% مەكتەپتەرگە جەتكىزىلەدى. بيىل «جەڭىل پورتفەل» جوباسى اياسىندا 1 قىركۇيەكتەن باستاپ بالالار مەن اتا-انالار ءۇشىن مينيسترلىك سايتىندا وقۋلىقتاردىڭ ەلەكتروندى نۇسقاسى قول جەتىمدى جانە ونى جۇكتەپ الۋعا بولادى.
وبلىستا 442 مەكتەپ جۇمىس ىستەيتىن بولادى. بولجام بويىنشا بيىل 1 سىنىپقا 28000-نان استام بالا كەلەدى دەپ كۇتىلۋدە.
"ادىرنا" ۇلتتىق پورتالى
