«جايلى مەكتەپ» ۇلتتىق جوباسى اياسىندا 1 قىركۇيەكتە تسەلينوگراد اۋدانىنا قاراستى تالاپكەر اۋىلىندا مەكتەپ-گيمنازياسى مەن IT-ليتسەيى وقۋشىلارعا ەسىكتەرىن ايقارا اشتى. جاڭا وقۋ جىلىندا 100-دەن استام پەداگوگ 1800-گە جۋىق وقۋشىعا ساپالى ءبىلىم بەرمەك.
ءبىلىم وشاقتارى 3 قاباتتى. كابينەتتەردىڭ بارلىعى زاماناۋي جابدىقتارمەن جابدىقتالعان. ساپالى ءبىلىم بەرۋ ءۇشىن مۇندا بارلىق جاعداي جان-جاقتى جاسالعان.
ينتەراكتيۆتى تاقتالارى بار پاندىك كابينەتتەردەن بولەك، شەبەرحانالار مەن زەرتحانالار دا بار. بالالاردىڭ قاۋىپسىزدىگىن قامتاماسىز ەتۋ ماقساتىندا بەينەباقىلاۋ كامەرالارى مەن دابىل تۇيمەلەرى ورناتىلعان.
اقمولا وبلىسىنىڭ اكىمى مارات احمەتجانوۆ مەكتەپ-گيمنازياسىنىڭ وقۋشىلارىن ءبىلىم كۇنىمەن قۇتتىقتادى.
«ەلورداعا ىرگەلەس جاتقان تسەلينوگراد اۋدانىندا حالىقتىڭ كوشى-قونىنا جانە دەموگرافيالىق وسۋگە بايلانىستى ۇزاق ۋاقىت بويى وقۋشى ورىندارىنىڭ تاپشىلىعى بايقالدى. پرەزيدەنت قاسىم-جومارت توقاەۆ باستاماشىلىق ەتكەن «جايلى مەكتەپ» جوباسى مەكتەپتەردەگى ورىن تاپشىلىعى ماسەلەسىن شەشەدى، وقۋشىلار مەن پەداگوگتار ءۇشىن قولايلى جاعداي جاسايدى جانە قالا مەن اۋىل مەكتەپتەرى اراسىنداعى ءبىلىم بەرۋ ساپاسىنداعى الشاقتىقتى ازايتادى. وسكەلەڭ ۇرپاقتىڭ ۇيلەسىمدى جانە باقىتتى بالالىق شاعى - ءبىزدىڭ جالپىۇلتتىق مىندەتىمىز. سىزدەرگە ساتتىلىك پەن جارقىن جەڭىستەر تىلەيمىن!»، - دەدى وبلىس اكىمى.
مەكتەپتەردىڭ سالتاناتتى اشىلۋ شاراسىنا دەنساۋلىق ساقتاۋ ءمينيسترى اقمارال ءالنازاروۆا مەن پارلامەنت ءماجىلىسىنىڭ دەپۋتاتى اسحات ايماعامبەتوۆ تە قاتىسىپ، جينالعان جۇرتشىلىقتى مەرەكەمەن قۇتتىقتادى.
«قازىر ءبىلىم بەرۋ سالاسىنا ەرەكشە كوڭىل بولىنۋدە. ءبىزدىڭ اۋىلدا جاڭا مەكتەپتەر سالىنىپ جاتقانىنا كۋا بولدىق. وقۋ ءبىر اۋىسىمدا بولادى، ال تۇسكى استان كەيىن بالالار ۇيىرمەلەر مەن سپورت سەكتسيالارىنا قاتىسا الادى»، - دەدى مەكتەپ-گيمنازياسى اتا-انالار كوميتەتىنىڭ توراعاسى قۇتتىباي بايعابىلوۆ.
ايتا كەتەيىك، جاڭا وقۋ جىلىندا وڭىردە 3 مەكتەپ ەل يگىلىگىنە بەرىلدى. ونىڭ 2-ءۋى «جايلى مەكتەپ» ۇلتتىق جوباسى اياسىندا سالىندى.
سونىمەن قاتار، جىل سوڭىنا دەيىن تاعى 11 ءبىلىم بەرۋ مەكەمەسى اشىلادى دەپ جوسپارلانىپ وتىر. ونىڭ 7-ءۋى «جايلى مەكتەپ» جوباسى اياسىندا بوي كوتەرۋدە.
وڭىردە 528 مەكتەپ بار. وندا 150 مىڭنان استام وقۋشى ءبىلىم الادى. ونىڭ ىشىندە 13 مىڭعا جۋىق ءبىرىنشى سىنىپ وقۋشىلارى.
