اقمولا وبلىسىنىڭ اكىمى مارات احمەتجانوۆ كوكشەتاۋ قالاسى بويىنشا جۇمىس ساپارى اياسىندا «ايالا»ينكليۋزيۆتى بالاباقشاسىندا بولدى.
تاربيە وشاعى 166 بالاعا ارنالعان. مۇندا وقۋ جانە تاربيە جۇمىستارى مەملەكەتتىك جانە ورىس تىلدەرىندە جۇرگىزىلەتىن بولادى. دياگنوزعا بايلانىستى 10-12 تاربيەلەنۋشىدەن 12 توپ اشۋ جوسپارلانىپ وتىر. بالاباقشاعا 3 جاستان باستاپ ەرەكشە بالالار قابىلدانادى.
«مۇندا تولىققاندى دامۋ ءۇشىن بارلىق جاعدايلار جاسالادى – تىرەك-قيمىل اپپاراتى بۇزىلعان بالالارعا ارنالعان توپتىق ساباقتار، پسيحيكالىق دامۋى تەجەلگەن بالالارعا ارنالعان توپتىق ءىس-شارالار. دارىگەر، دەفەكتولوگ، پسيحولوگ، لوگوپەد كابينەتتەرى، سونداي-اق وقۋ – دەنە شىنىقتىرۋ الاڭى جۇمىس ىستەيدى»، - دەپ ءبولىستى «ايالا» بالاباقشاسى ديرەكتورىنىڭ مىندەتىن اتقارۋشى گۇلنار بەگجانوۆا.
وبلىس اكىمى مۇنداي مەكەمەنىڭ اشىلۋى ەرەكشە كومەككە مۇقتاج جاندار ءۇشىن ۇلكەن سىي بولاتىنىن اتاپ ءوتتى.
«مەملەكەت ينكليۋزيۆتى ءبىلىم بەرۋدى دامىتۋعا ەرەكشە كوڭىل بولەدى. وبلىستا رەسۋرستىق كابينەتتەر جەلىسى كەڭەيىپ، بۇل جۇمىستار ودان ءارى جالعاسىن تابادى. ءار بالاعا ەرەكشىلىگىنە قاراماستان، جالپى ءبىلىم بەرەتىن مەكەمەلەردە وقۋىنا مۇمكىندىك بەرىلەدى»، - دەدى م.احمەتجانوۆ.
بالاباقشادا كەشەندى ەمدەۋ، تۇزەتۋ جانە الەۋمەتتىك بەيىمدەلۋ ءۇشىن بارلىق جاعداي جاسالعان.
سونداي-اق، بۇل بالالاردى قوعام شەتتەتپەۋى ءۇشىن كەشەندى پسيحولوگيالىق-پەداگوگيكالىق كومەك كورسەتۋ، ەرەكشە بالالاردى وتباسىلىق تاربيەلەۋ ماسەلەلەرى بويىنشا اتا-انالارعا كەڭەس بەرۋ جانە وقىتۋ جۇمىستارى قاراستىرىلدى.
بۇگىن كۇردەلى جوندەۋدەن كەيىن «ەر-توستىك» بالاباقشاسى ءوز ەسىگىن ايقارا اشتى. ايتا كەتەيىك، بيىل كوكتەمگى سۋ تاسقىنى كەزىندە عيماراتتىڭ ىشىنە سۋ كىرگەن ەدى.
«كوكشەتاۋ-2015» جشس مەردىگەر ۇيىمى ينجەنەرلىك كوممۋنيكاتسيالاردى بولشەكتەپ، ىشكى ارلەۋ جۇمىستارىن جۇرگىزدى. كىرەبەرىسى جوندەلىپ، ويىن الاڭدارى اباتتاندىرىلدى.
ايتا كەتەيىك، اقمولا وبلىسىندا 38 مىڭ بالا بار. 597 مەكتەپكە دەيىنگى ۇيىم جۇمىس ىستەيدى، ونىڭ ىشىندە 260 بالاباقشا. جىل سايىن ينكليۋزيۆتى ءبىلىم بەرۋدى جۇزەگە اسىراتىن ءبىلىم بەرۋ ۇيىمدارىنىڭ سانى ارتىپ كەلەدى. ەرەكشە بالالارعا ارنالعان 65 ينكليۋزيۆتى كابينەت جۇمىس ىستەيدى. وندا 1 مىڭنان استام بالا بارادى. جىل سوڭىنا دەيىن تاعى وسىنداي 11 نىسان اشىلادى دەپ جوسپارلانۋدا.
