Aqmola oblysynyń ákimi Marat Ahmetjanov Kókshetaý qalasy boıynsha jumys sapary aıasynda «Aıala»ınklıýzıvti balabaqshasynda boldy.
Tárbıe oshaǵy 166 balaǵa arnalǵan. Munda oqý jáne tárbıe jumystary memlekettik jáne orys tilderinde júrgiziletin bolady. Dıagnozǵa baılanysty 10-12 tárbıelenýshiden 12 top ashý josparlanyp otyr. Balabaqshaǵa 3 jastan bastap erekshe balalar qabyldanady.
«Munda tolyqqandy damý úshin barlyq jaǵdaılar jasalady – tirek-qımyl apparaty buzylǵan balalarǵa arnalǵan toptyq sabaqtar, psıhıkalyq damýy tejelgen balalarǵa arnalǵan toptyq is-sharalar. Dáriger, defektolog, psıholog, logoped kabınetteri, sondaı-aq oqý – dene shynyqtyrý alańy jumys isteıdi», - dep bólisti «Aıala» balabaqshasy dırektorynyń mindetin atqarýshy Gúlnar Begjanova.
Oblys ákimi mundaı mekemeniń ashylýy erekshe kómekke muqtaj jandar úshin úlken syı bolatynyn atap ótti.
«Memleket ınklıýzıvti bilim berýdi damytýǵa erekshe kóńil bóledi. Oblysta resýrstyq kabınetter jelisi keńeıip, bul jumystar odan ári jalǵasyn tabady. Ár balaǵa erekshiligine qaramastan, jalpy bilim beretin mekemelerde oqýyna múmkindik beriledi», - dedi M.Ahmetjanov.
Balabaqshada keshendi emdeý, túzetý jáne áleýmettik beıimdelý úshin barlyq jaǵdaı jasalǵan.
Sondaı-aq, bul balalardy qoǵam shettetpeýi úshin keshendi psıhologııalyq-pedagogıkalyq kómek kórsetý, erekshe balalardy otbasylyq tárbıeleý máseleleri boıynsha ata-analarǵa keńes berý jáne oqytý jumystary qarastyryldy.
Búgin kúrdeli jóndeýden keıin «Er-tóstik» balabaqshasy óz esigin aıqara ashty. Aıta keteıik, bıyl kóktemgi sý tasqyny kezinde ǵımarattyń ishine sý kirgen edi.
«Kókshetaý-2015» JShS merdiger uıymy ınjenerlik kommýnıkaııalardy bólshektep, ishki árleý jumystaryn júrgizdi. Kireberisi jóndelip, oıyn alańdary abattandyryldy.
Aıta keteıik, Aqmola oblysynda 38 myń bala bar. 597 mektepke deıingi uıym jumys isteıdi, onyń ishinde 260 balabaqsha. Jyl saıyn ınklıýzıvti bilim berýdi júzege asyratyn bilim berý uıymdarynyń sany artyp keledi. Erekshe balalarǵa arnalǵan 65 ınklıýzıvti kabınet jumys isteıdi. Onda 1 myńnan astam bala barady. Jyl sońyna deıin taǵy osyndaı 11 nysan ashylady dep josparlanýda.
