ەرلى-زايىپتى بۋراك دۋران مەن يديل دۋران جەكە اۆتوبۋسىمەن دۇنيەجۇزىلىك كوشپەندىلەر ويىنىن تاماشالاۋ ءۇشىن انكارادان استاناعا جولعا شىقتى، دەپ حابارلايدى «ادىرنا» ءتىلشىسى «Qazaqstan» ۇلتتىق ارناسىنا سىلتەمە جاساپ.
تەلەارنا مالىمەتىنشە، تۇرىك وتباسى استاناعا دەيىن 5400 شاقىرىم جول جۇرەدى. انىعىن ايتقاندا، تۇركيادان گرۋزياعا، كەيىن رەسەيگە ءوتىپ، تاتارستان ارقىلى قازاقستانعا جەتپەك.
بۇل وليمپيادا ويىندارى سياقتى اۋقىمدى جارىس. سوندىقتان كوشپەندىلەر ويىنىنى مەن ونىڭ قاتىسۋشىلارىن الەمگە كورسەتۋ كەرەك. دودانىڭ بيىل قازاقستاندا وتەتىنىن ەستىپ، نەگە «كوشپەندى» دەپ اتالاتىن اۆتوبۋسىمىزبەن الىس ساياحاتقا شىقپاسقا دەگەن وي كەلدى. تۇركياداعى جەرلەستەرىمىزگە قازاقستانعا بارا جاتقانىمىزدى ايتقاندا قاتتى تاڭعالدى. ءبىز وتباسىمىزبەن سپورتشىلارىمىزعا جانكۇيەر بولىپ، قولداۋ بىلدىرگىمىز كەلەدى. اۆتوبۋستى باسپانا رەتىندە ارنايى جابدىقتاۋ ءۇشىن 3 جىل كەتتى. قازىر گرۋزياعا ات باسىن تىرەدىك. 2 جاسار ۇلىمىزبەن بىرگە بۇكىل ورتالىق ازيانى ارالايمىز. وسى تۇستا كوزىمە جاس كەلىپ، ءبىراز تولقىپ تۇرمىن. ويتكەنى ءبىز باۋىرلاس حالىقپىز، قازاقستان — ءبىزدىڭ اتا جۇرتىمىز»،—دەيدى يديل دۋران.
ايتا كەتەيىك، تۇركى الەمى كوز تىككەن كوشپەندىلەر ويىنى كەزىندە ەلورداعا جالپى 100 مىڭنان استام تۋريست كەلەدى دەپ كۇتىلىپ وتىر. وسىعان وراي 20-دان استام قوناقۇيدىڭ، سونداي-اق تۋريستەر ءجيى باراتىن ورىنداردىڭ دايىندىعى پىسىقتالىپ، قالا كوشەلەرىن اباتتاندىرۋ، بەزەندىرۋ قارقىندى جۇرگىزىلىپ جاتىر.
<
