مۇراتحان توقمادي ەركىن تاتىشەۆ پەن اقش فتب-نىڭ بۇرىنعى ديرەكتورى لۋي فري كەلتىرگەن دەرەكتەردى جوققا شىعاردى، دەپ حابارلايدى "ادىرنا" ۇلتتىق پورتالى كۋرسيۆ.مەدياعا سىلتەپ.
وتباسىنىڭ پىكىرىنشە، ولاردىڭ ماقساتى – مۇراتحان توقماديدى شارتتى تۇردە مەرزىمىنەن بۇرىن بوساتۋعا كەدەرگى جاساۋ، اپپەلياتسيالىق ساتىداعى سوتقا قىسىم جاساۋ.
مالىمدەمەدە توقماديدىڭ ءۇش مارتە مەرزىمىنەن بۇرىن بوساتۋعا ءوتىنىش بەرگەنىن، بىراق ەكى مارتە «ءوزىن-ءوزى ۇستاۋدىڭ جەتكىلىكسىزدىگى»، «توسەگىن جيناماۋ» جانە «ناماز وقۋ» سياقتى ءارتۇرلى سەبەپتەرمەن قابىلدانباعانىن ايتىلادى.
جازا مەرزىمىنىڭ ۇشتەن ەكى بولىگىن وتەگەن مۇراتحان توقماديدىڭ تارتىبىنە وڭ سيپاتتاما بەرىلگەننەن كەيىن عانا ءۇشىنشى ءوتىنىشى قاناعاتتاندىرىلىپ وتىر.
«جابىرلەنۋشى تاراپتىڭ مىندەتتى كەلىسىمى تەك وتەلمەگەن ازاماتتىق تالاپ-ارىزبەن «شارتتى تۇردە مەرزىمىنەن بۇرىن بوساتۋ» قارالعان جاعدايدا عانا قاجەت. ءبىزدىڭ جاعدايدا، 10.5 جىلعا سوتتاعان تاراز قالاسى سوتىنىڭ 16.03.2018 جىلعى ۇكىمىنە سايكەس، جابىرلەنۋشى تاراپتىڭ وتەلمەگەن تالاپ-ارىزى جوق»، – دەيدى وتباسى مۇشەلەرى.
توقمادي وتباسى Freeh Group Unternational Solutions جەكە امەريكالىق كونسالتينگتىك كومپانياسىنىڭ نەگىزىن قالاۋشى جانە فتب-نىڭ بۇرىنعى ديرەكتوردى لۋيس فريگە قاتىستى دا ءوز ءۋاجىن ايتتى. ول جۇرگىزگەن ساراپتامانى «تاۋەلسىز» دەپ تىرناقشاعا الىپ وتىر. ولاردىڭ ايتۋىنشا، ساراپتاما وقيعا ورنىندا ەمەس، الماتى قالاسىنداعى ۇقك عيماراتىنىڭ اۋلاسىندا «ءىس ماتەريالدارىن» زەردەلەۋ نەگىزىندە عانا جۇرگىزىلگەن. وق اتىلعان كولىككە ساراپتاما جاسالماعان. قارۋ 2007 جىلدان 2017 جىلعا دەيىن، ياعني ءىس قايتا قارالعانعا دەيىن 10 جىل بويى ەركىن تاتىشەۆتە بولعان.
توقمادي وتباسىنىڭ پىكىرىنشە، مەرزىمىنەن بۇرىن شارتتى تۇردە بوستاندىققا شىعۋ زاڭ اياسىندا جۇزەگە اسىپ جاتىر.
«مۇراتحان توقمادي، كەز-كەلگەن قازاقستان ازاماتى سەكىلدى، شارتتى تۇردە مەرزىمىنەن بۇرىن بوساتىلۋعا قۇقىلى»، – دەلىنگەن مالىمدەمەدە.
ايتا كەتەتىن جايت، الماتى وبلىستىق سوتىندا بانكير ەرجان تاتىشەۆتى ولتىرگەنى ءۇشىن سوتتالعان مۇقتارحان توقماديدى مەرزىمىمەن بۇرىن بوستاندىققا شىعارۋ تۋرالى شەشىمگە قارسى جابىرلەنۋشى تاراپتىڭ اپپەللياتسيالىق شاعىمى قارالىپ جاتىر. العاشقى وتىرىس 23 تامىزدا ءوتتى. وندا جابىرلەنۋشى تاراپ بۇل شەشىمگە ءۇزىلدى-كەسىلدى قارسى ەكەنىن ءبىلدىردى. بانكير ەرجان تاتىشەۆتىڭ ءىنىسى ەركىن تاتىشەۆتىڭ ادۆوكاتتارى مەرزىمىمەن بۇرىن بوساتۋ شارتتارىنا توقماديدىڭ ءىس-اركەتتەرى سايكەس كەلمەيتىنىنە باسا نازار اۋداردى. ولار جازا تىم جەڭىل بولدى دەپ ەسەپتەيدى. الماتى وبلىستىق سوتى كەلەسى وتىرىستى 6 قىركۇيەككە بەلگىلەدى.
