مەملەكەت باسشىسىنىڭ تاپسىرماسىنا جاۋاپ رەتىندە ىسكە اسىرىلاتىن "اۋىلدىق دەنساۋلىق ساقتاۋدى جاڭعىرتۋ" ۇلتتىق جوباسى اياسىندا ەسىل اۋدانىنىڭ ەكى اۋىلىندا دارىگەرلىك امبۋلاتوريا سالىنىپ جاتىر.
بۇل مەديتسينالىق وبەكتىلەردى قۇرۋدىڭ نەگىزگى ماقساتى اۋىل تۇرعىندارىن العاشقى مەديتسينالىق-سانيتارلىق كومەكپەن قامتاماسىز ەتۋ، سونداي-اق اسقىنۋلاردىڭ الدىن الۋ ءۇشىن پروفيلاكتيكالىق تەكسەرۋلەردىڭ، سكرينينگتەردىڭ، اۋرۋلاردى ەرتە انىقتاۋدىڭ جانە ۋاقتىلى مەديتسينالىق كومەك كورسەتۋدىڭ قولجەتىمدىلىگىن ارتتىرۋ بولىپ تابىلادى.
سۆوبودنىي جانە اقساي اۋىلدارىندا تۇرعىندار كوپتەن كۇتكەن جاڭا دارىگەرلىك امبۋلاتوريالار پايدا بولادى. بۇرىن اۋىلداردا مەديتسينالىق قىزمەتتەردى تەك ءبىر جالپى پراكتيكا دارىگەرى، ونىڭ ءوزى وسى ماقساتتارعا ارنالماعان عيماراتتا كورسەتكەن. جاڭا امبۋلاتوريالار كۇنىنە 45 ادامعا دەيىن قابىلدايتىن بولادى.
ازامات قوجاحمەتوۆ، ەسىل اۋداندىق اۋرۋحاناسىنىڭ باس دارىگەرى:
— دارىگەرلىك امبۋلاتوريالاردا ءبىر جالپى پراكتيكا دارىگەرى جانە مەديتسينالىق كومەك كورسەتەتىن ءۇش مەدبيكە بولادى. امبۋلاتوريالار بارلىق تالاپتارعا ساي بولادى جانە قاجەتتى مەديتسينالىق جابدىقتارمەن جابدىقتالادى. سۆوبودنىي اۋىلىندا سالىنىپ جاتقان نىساننىڭ قۇنى 320,3 ملن تەڭگەنى، ال اقساي اۋىلىندا — 325,9 ملن تەڭگەنى قۇرايدى. قارجىلاندىرۋ رەسپۋبليكالىق بيۋدجەتتەن "اۋىلدىق دەنساۋلىق ساقتاۋدى جاڭعىرتۋ" باعدارلاماسى اياسىندا جۇزەگە اسىرىلادى.
بۇگىنگى تاڭدا ەسىل اۋدانىندا كۇندىزگى ستاتسيوناردىڭ 45 ورنىنا ەسەپتەلگەن 7 دارىگەرلىك امبۋلاتوريا جۇمىس ىستەيدى.
