اباي وبلىسىندا شەتەلدىكتەردى ۇرلاپ اكەتىپ، بوپسالاعان 4 قازاقستاندىققا قاتىستى سوت ۇكىمى شىقتى، دەپ حابارلايدى “ادىرنا” ۇلتتىق پورتالى.
قىلمىستىق ىستەر جونىندەگى مامانداندىرىلعان اۋدانارالىق سوتىندا قىلمىستىق كودەكستىڭ “بوپسالاۋ", “توناۋ", “ادام ۇرلاۋ" باپتارى بويىنشا ايىپتالعان 4 سوتتالۋشىعا قاتىستى ءىس قارالدى.
سوت ساراپتاماسى انىقتاعانداي، ءىس بويىنشا ەكى ايىپتالۋشى مەيرامحانادا ءۇش تانىسىمەن كەزدەسكەن. ولاردىڭ اراسىندا كاسىپكەر دە بولعان. مۇنى بىلگەن سوتتالۋشىلار ونى الداپ، تۇرعىن ءۇي كەشەندەرىنىڭ بىرىندەگى جالدامالى پاتەرگە الىپ بارعان. تەرگەۋ مالىمەتتەرى بويىنشا، كۇدىكتىلەر كاسىپكەردى ۇرىپ-سوعىپ، جاقىندارىڭدى ولتىرەمىز، ار-نامىسىڭا نۇقسان كەلتىرەتىن اقپارات تاراتامىز دەپ قورقىتىپ، اقشا ءوندىرىپ العان.
"ولار ەر ادامنىڭ تاماعىنا پىشاق تاقاپ، فوتو جانە ۆيدەوعا ءتۇسىرىپ، 200 000 اقش دوللارىن جانە ءۇش اۆتوكولىك تالاپ ەتكەن. كولىكتەردىڭ ءبىرى 20 000 000 تەڭگەگە باعالاعان", – دەپ حابارلادى اباي وبلىستىق سوتىنىڭ ءباسپاسوز قىزمەتى.
سونىمەن قاتار كۇدىكتىلەر شەتەل ازاماتتارىنا قاتىستى دا قىلمىس جاساعان. تەرگەۋ بارىسىندا انىقتالعانداي، سوتتالۋشى ن. وسكەمەن قالاسىندا التىن وندىرۋمەن اينالىساتىن ەكى قىتاي ازاماتىن كەلىسىلگەن جەرگە الىپ بارامىن دەپ ۋادەلەسكەن. ارتىنشا كۇدىكتى م-مەن كولىككە شابۋىل ۇيىمداستىرعان.
"ولار الدىن الا ءسوز بايلاسىپ، اسكەري كامۋفلياج، ارقان، بەتپەردە جانە تاپانشاعا ۇقساس زات دايىنداعان. ارتىنشا ولار جابىرلەنۋشىلەر وتىرعان كولىككە شابۋىل جاساعان. كۇدىكتىلەر جابىرلەنۋشىلەردى ۇرىپ-سوعىپ، ولتىرەمىز دەپ قورقىتىپ، ۇيالى تەلەفوندارى مەن اقشالارىن تارتىپ العان”، – دەلىنگەن اباي وبلىستىق سوتىنىڭ حابارلاماسىندا.
ايىپتالۋشىلار كولىك جۇرگىزۋشىسىمەن ءسوز بايلاسقانىن جاسىرۋ ءۇشىن ونى دا ۇرىپ-سوققان كەيىپ تانىتىپ، تەلەفونىن تارتىپ العان.
"سودان كەيىن قىتاي ازاماتتارىن جۇك سالعىشقا سالىپ، كوپ اقشا تالاپ ەتىپ، ۇرلاپ اكەتكەن", - دەلىنگەن حابارلامادا.
ءىس بويىنشا جابىرلەنۋشىلەر كۇدىكتىلەردى كىنالى دەپ تاۋىپ، باس بوستاندىعىنان ايىرۋدى سۇرادى. ال كۇدىكتىلەر ءوز كىنالارىن مويىنداۋدان باس تارتتى.
سوت ايىپتالۋشىلاردى كىنالى دەپ تاپتى. ولاردىڭ ەكەۋى 11 جانە 10 جىلعا باس بوستاندىعىنان ايىرىلدى. ءىس بويىنشا تاعى ەكى ايىپتالۋشى 9 جىلعا جانە 8 جىل 6 ايعا باس بوستاندىعىنان ايىرۋ جازاسىنا كەسىلىپ، جازاسىن قاۋىپسىزدىگى ورتاشا مەكەمەدە وتەيدى.
