Abaı oblysynda sheteldikterdi urlap áketip, bopsalaǵan 4 qazaqstandyqqa qatysty sot úkimi shyqty, dep habarlaıdy “Adyrna” ulttyq portaly.
Qylmystyq ister jónindegi mamandandyrylǵan aýdanaralyq sotynda Qylmystyq kodekstiń “bopsalaý", “tonaý", “adam urlaý" baptary boıynsha aıyptalǵan 4 sottalýshyǵa qatysty is qaraldy.
Sot saraptamasy anyqtaǵandaı, is boıynsha eki aıyptalýshy meıramhanada úsh tanysymen kezdesken. Olardyń arasynda kásipker de bolǵan. Muny bilgen sottalýshylar ony aldap, turǵyn úı keshenderiniń birindegi jaldamaly páterge alyp barǵan. Tergeý málimetteri boıynsha, kúdiktiler kásipkerdi uryp-soǵyp, jaqyndaryńdy óltiremiz, ar-namysyńa nuqsan keltiretin aqparat taratamyz dep qorqytyp, aqsha óndirip alǵan.
"Olar er adamnyń tamaǵyna pyshaq taqap, foto jáne vıdeoǵa túsirip, 200 000 AQSh dollaryn jáne úsh avtokólik talap etken. Kólikterdiń biri 20 000 000 teńgege baǵalaǵan", – dep habarlady Abaı oblystyq sotynyń baspasóz qyzmeti.
Sonymen qatar kúdiktiler shetel azamattaryna qatysty da qylmys jasaǵan. Tergeý barysynda anyqtalǵandaı, sottalýshy N. Óskemen qalasynda altyn óndirýmen aınalysatyn eki Qytaı azamatyn kelisilgen jerge alyp baramyn dep ýádelesken. Artynsha kúdikti M-men kólikke shabýyl uıymdastyrǵan.
"Olar aldyn ala sóz baılasyp, áskerı kamýflıaj, arqan, betperde jáne tapanshaǵa uqsas zat daıyndaǵan. Artynsha olar jábirlenýshiler otyrǵan kólikke shabýyl jasaǵan. Kúdiktiler jábirlenýshilerdi uryp-soǵyp, óltiremiz dep qorqytyp, uıaly telefondary men aqshalaryn tartyp alǵan”, – delingen Abaı oblystyq sotynyń habarlamasynda.
Aıyptalýshylar kólik júrgizýshisimen sóz baılasqanyn jasyrý úshin ony da uryp-soqqan keıip tanytyp, telefonyn tartyp alǵan.
"Sodan keıin Qytaı azamattaryn júk salǵyshqa salyp, kóp aqsha talap etip, urlap áketken", - delingen habarlamada.
Is boıynsha jábirlenýshiler kúdiktilerdi kináli dep taýyp, bas bostandyǵynan aıyrýdy surady. Al kúdiktiler óz kinálaryn moıyndaýdan bas tartty.
Sot aıyptalýshylardy kináli dep tapty. Olardyń ekeýi 11 jáne 10 jylǵa bas bostandyǵynan aıyryldy. Is boıynsha taǵy eki aıyptalýshy 9 jylǵa jáne 8 jyl 6 aıǵa bas bostandyǵynan aıyrý jazasyna kesilip, jazasyn qaýipsizdigi ortasha mekemede óteıdi.
