اقمولا ۆەتەريناريالىق ستانتسيالارىنا 19 بىرلىك قىزمەتتىك اۆتوكولىگى تابىستالدى. اۋداندىق ۆەتەريناريا بولىمدەرىنىڭ باسشىلارىنا اۆتوكولىكتەردىڭ كىلتتەرىن وبلىس اكىمى
مارات احمەتجانوۆ تاپسىردى.
ءوڭىر باسشىسى ءوز سوزىندە ۆەتەريناريا سالاسىنىڭ ستراتەگيالىق ماڭىزدىلىعىن اتاپ ءوتتى.
«سىزدەردىڭ قىزمەتتەرىڭىز ەت جانە ءسۇت ونىمدەرىنىڭ ساپاسىن باقىلاۋدى قامتاماسىز ەتۋ، سونداي-اق جانۋارلار اراسىندا قاۋىپتى اۋرۋلاردىڭ تارالۋىنىڭ الدىن الۋ ارقىلى حالىقتىڭ دەنساۋلىعىنا تىكەلەي اسەر ەتەدى»، - دەپ اتاپ ءوتتى م.احمەتجانوۆ.
سوڭعى جىلدارى ۆەتەرينارلىق قىزمەتتەردىڭ ماتەريالدىق-تەحنيكالىق بازاسىن جاقسارتۋ ماسەلەلەرى شەشىلۋدە. جاڭا كولىكتەردەن باسقا، پلانشەتتەر، مودۋلدىك ۆەتەريناريالىق پۋنكتتەر ساتىپ الىندى جانە ۇلگىلىك مال قورىمدارىنىڭ قۇرىلىسى جۇرگىزىلۋدە. مۇنىڭ ءبارى ۆەتەرينارلار جۇمىسىنىڭ تيىمدىلىگىن ارتتىرۋعا جانە حالىققا كورسەتىلەتىن قىزمەتتەردىڭ ساپاسىن جاقسارتۋعا، ەپيزووتيالىق جانە ەپيدەميولوگيالىق جاعدايدى تۇراقتاندىرۋعا، كادر ماسەلەسىن شەشۋگە باعىتتالعان.
«جاڭا اۆتوكولىك – بۇل ەڭ الدىمەن ەلدى مەكەندەر اراسىنداعى جىلدام قوزعالىس. كوبىنەسە قيىندىقتار اۋا-رايىنىڭ قولايسىزدىعىندا بولادى. تەحنيكا سوڭعى رەت 10 جىل بۇرىن جاڭارتىلعان»، - دەدى ەرەيمەنتاۋ اۋدانىنىڭ ۆەتەريناريالىق ستانتسياسىنىڭ باستىعى ورال تولەۋوۆ.
ايتا كەتەيىك، اقمولا وبلىسىندا 19 مەملەكەتتىك ۆەتەريناريالىق ۇيىم، اۋىلدىق جەرلەردە 217 ۆەتەريناريالىق پۋنكت جۇمىس ىستەيدى.
