ەلورداداعى جەڭىل رەلستى كولىك قۇرىلىسىن اياقتاۋعا قاجەت قاراجاتتى "حالىق بانك" بەرەتىن بولدى. بۇل تۋرالى بۇگىن نۇر-سۇلتان قالاسىنىڭ اكىمى التاي كولگىنوۆ ايتتى، دەپ حابارلايدى Sputnik قازاقستان تىلشىسى.

"حالىق بانكپەن 3% مولشەرلەمەمەن 500 ميلليون دوللار جانە "بايتەرەك" حولدينگىمەن تاعى 100 ميلليون دوللار قارىز تۋرالى كەلىستىك. جۇمىستى بيىل باستاۋ ءۇشىن بۇل جەتكىلىكتى. جاقىن ارادا وبليگاتسيالار شىعارىلادى", - دەدى كولگىنوۆ ۇكىمەت كۋلۋارىندا.

ول ۇكىمەتتىڭ قىتايدىڭ قارىزىنان باس تارتىپ، وسى ارقىلى 800 ميلليون دوللار ۇنەمدەگەنىن ەسكە سالدى.

"LRT بويىنشا بارلىق ءنورماتيۆتى-قۇقىقتىق اكتىلەر ۇكىمەتتىك جانە جەرگىلىكتى اتقارۋشى ورگاندار دەڭگەيىندە قابىلداندى. قازىر ەكىنشى دەڭگەيلى بانكتەرمەن جۇمىس جۇرگىزىلىپ جاتىر", - دەدى ەلوردا اكىمى.

بۇعان دەيىن قازاقستان پرەزيدەنتى قاسىم-جومارت توقاەۆ استانا LRT جوباسىن سىنعا العان بولاتىن. پرەزيدەنتتىڭ ايتۋىنشا، جوبا ءتيىمسىز بولسا، وعان ۇنەمى سۋبسيديا ءبولىپ، بيۋدجەت قارجىسىن جۇمساۋعا تۋرا كەلەدى.

باستاپقىدا LRT جوباسىنىڭ قۇنى 1,8 ميلليار دوللار بولعان ەدى. قىتايدىڭ دامۋ بانكىنەن قارىز العان جاعدايدا، ۇكىمەت 2,6 ميلليارد دوللار قايتارۋى ءتيىس بولاتىن. الايدا مەملەكەت شەتەلدىك قارىزدان باس تارتتى.