وبلىستىڭ 43 مىڭنان استام ادام تۇراتىن 14 اۋدانىندا 38 العاشقى مەديتسينالىق-سانيتارلىق كومەك نىساندارىنىڭ قۇرىلىسى جوسپارلانعان. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە اقمولا وبلىسى دەنساۋلىق ساقتاۋ باسقارماسى باسشىسىنىڭ مىندەتى اتقارۋشى باۋىرجان سىزدىقوۆ ءمالىم ەتتى.
ونىڭ ايتۋىنشا، بۇگىنگى تاڭدا بارلىق جوبالار بويىنشا ساراپتاما قورىتىندىلارى الىندى. التى نىسان بويىنشا وبەكتىنىڭ قۇرىلىسىنا تالون الۋ بويىنشا راسىمدەر جۇرگىزىلىپ جاتىر. مەردىگەرلىك ۇيىمداردى انىقتاۋ بويىنشا كونكۋرستىق راسىمدەر 3 نىسان بويىنشا قولعا الىنعان. ال قالعان 29 نىسان بويىنشا قۇرىلىس-مونتاج جۇمىستارى جۇرگىزىلۋدە.
بۇدان باسقا، ەكى اۋراحانادا - اتباسار كوپسالالى اۋدانارالىق اۋرۋحاناسىندا جانە ستەپنوگورسك كوپسالالى قالالىق اۋرۋحاناسىندا جاڭعىرتۋ جۇمىستارى جۇرگىزىلىپ جاتىر. ەكى مەديتسينالىق مەكەمەدە دە جوندەۋ جۇمىستارى باستالدى.
«مەديتسينالىق تەحنيكامەن جابدىقتالۋىنا كەلەتىن بولساق، بۇل كورسەتكىش 2,7 پايىزعا ارتىپ، 83 پايىزدان استامدى قۇرايدى. وتكەن جىلى اۋىلدىق دەنساۋلىق ساقتاۋ وبەكتىلەرى ءۇشىن 111 بىرلىك مەديتسينالىق تەحنيكا ساتىپ الىندى. بۇل ەكى انگيوگرافيالىق قوندىرعى، ءتورت ۆيدەوەندوسكوپيالىق كەشەن، كومپيۋتەرلىك توموگرافيا، ءۇش ۋلترادىبىستىق دياگنوستيكا اپپاراتى، ساندىق رەنتگەنوگرافيا جۇيەسى. بۇگىنگى تاڭدا 63 بىرلىك مەديتسينالىق تەحنيكا ساتىپ الىندى. بۇدان باسقا، كەلەسى جىلى ستەپنوگورسك جانە اتباسار اۋرۋحانالارىنا مرت اپپاراتتارى مەن كومپيۋتەرلىك توموگرافتاردى ساتىپ الۋ جوسپاردا بار»، - دەدى باۋىرجان سىزدىقوۆ.
سونداي-اق، وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى بيىلعى جىلى جۇرگىزىلىپ جاتقان كۇردەلى جانە اعىمداعى جوندەۋلەردىڭ ارقاسىندا دەنساۋلىق ساقتاۋ ۇيىمدارى عيماراتتارىنىڭ توزۋىن 7,4 پايىزعا ازايتۋعا قول جەتكىزىلگەنىن اتاپ ءوتتى.
سالاداعى ەڭ وزەكتى ماسەلەلەردىڭ ءبىرى-كادر تاپشىلىعى. اۋىلدىق دەنساۋلىق ساقتاۋ وبەكتىلەرىن ماماندارمەن قامتاماسىز ەتۋ ءۇشىن دارىگەرلەر مەن ورتا مەديتسينا قىزمەتكەرلەرىنىڭ كادرلىق رەزەرۆى قۇرىلدى. جالپى، ۇيىمداردىڭ مەديتسينا قىزمەتكەرلەرىمەن قامتىلۋى 90 پايىزدان اسادى.
«ءبىز كادر تاپشىلىعىن 22 پايىزعا تومەندەتە الدىق. سونىمەن قاتار، ايماققا كەلگەن دارىگەرلەر الەۋمەتتىك قولداۋ - تولەمدەر مەن باسپانا الادى. بيىلعى جىلدىڭ تامىز-قىركۇيەك ايلارىندا 120 سالالىق ماماننىڭ كەلۋىن كۇتەمىز. سونىمەن قاتار، 35 ادام ەلىمىزدىڭ جوعارى وقۋ ورىندارىنا كىشى ماماندىقتار بويىنشا وقۋعا جىبەرىلەدى، وعان قوسا، «جالپى مەديتسينا» ماماندىعى بويىنشا باكالاۆرياتقا 50 گرانت بولىنەدى. سونداي-اق كوكشەتاۋ جوعارى مەديتسينالىق كوللەدجىندە مەديتسينالىق كادرلاردى دايارلاۋعا مەملەكەتتىك تاپسىرىس بويىنشا 245 گرانت ءبولىندى»، - دەپ تولىقتىردى باۋىرجان سىزدىقوۆ.
