ءماجىلىس دەپۋتاتى ەرمۇرات ءباپي قايرات ساتىبالدىنىڭ اكتيۆتەرى قايتارىلىپ جاتقانى تۋرالى اقپارعا كۇمانمەن قارايتىنىن مالىمدەدى، دەپ حابارلايدى «ادىرنا» ءتىلشىسى.
«ونى شارتتى تۇردە مەرزىمىنەن بۇرىن بوساتۋعا دايىنداپ جاتىر ما، الدە تازا راقىمشىلىق جاساي ما؟ ۇرلانعان اكتيۆتەردى ءوز ەركىمەن قايتارعانى جاقسى. الايدا كورسەتىلگەن سول سومالاردىڭ ەل قازىناسىنا ءتۇسىپ جاتقانى قانشالىقتى راس؟ كورسەتىلگەن رەسمي ساندارعا سەنەمىز بە، الدە سەنبەيمىز بە، ونى تەك بولجاۋ عانا قالدى. سەبەبى قايتارىلعان اكتيۆتەر جيناقتالاتىن 100% ۇكىمەتتىك كومپانياعا قوعامدىق باقىلاۋ جۇرگىزىلمەيدى»، - دەدى ول.
ەسكە سالايىق، سوڭعى كەزدەرى ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدىنىڭ اكتيۆتەردى قايتارىپ جاتقانى جايلى حابار جيىلەگەن بولاتىن. بۇگىن باس پروكۋراتۋرانىڭ اكتيۆتەردى قايتارۋ جونىندەگى كوميتەتى قايرات ساتىبالدىنىڭ مەملەكەتكە 50 ميلليارد تەڭگەدەن استام اكتيۆتى قايتاراتىنىن ايتقان ەدى.
