بۇگىن قازاق ۇلتتىق قىزدار پەداگوگيكالىق ۋنيۆەرسيتەتىنىڭ قۇرىلعانىنا 80 جىل تولدى، دەپ حابارلايدى «ادىرنا» ءتىلشىسى.
جوعارى وقۋ ورنىنىڭ نەگىزى 1944 جىلى 15 تامىزدا قالانعان ەدى. سول جىلدىڭ قىركۇيەك ايىندا ينستيتۋتتا فيزيكا-ماتەماتيكا، ءتىل-ادەبيەت جانە تاريح فاكۋلتەتتەرى اشىلىپ، 100 ستۋدەنت وقۋعا قابىلداندى. 1944 جىلى ينستيتۋتتىڭ ءۇش فاكۋلتەتىندە قىزمەت ەتكەن ەڭ العاشقى 20 وقىتۋشىنىڭ بەسەۋى عىلىم كانديداتى، سەگىزى اعا وقىتۋشى جانە جەتەۋى وقىتۋشى بولدى.
قارا شاڭىراقتىڭ اشىلۋىنا قانىش ساتباەۆ، مۇحتار اۋەزوۆ، ءسابيت مۇقانوۆ، عابيت مۇسىرەپوۆ، ءىلياس وماروۆ، جۇماباي شاياحمەتوۆ، نۇرتاس وڭداسىنوۆ، الكەي مارعۇلان، نىعمەت ساۋرانباەۆ، قاجىم جۇماليەۆ، احمەت جۇبانوۆ سىندى ۇلتىمىزدىڭ داڭقتى پەرزەنتتەرى ۇلكەن قولداۋ كورسەتتى.
بۇگىندە ۋنيۆەرسيتەتتە زاماناۋي تالاپتارعا ساي كرەديتتىك تەحنولوگيا جۇيەسى نەگىزىندە 43 ماماندىق بويىنشا 9 000-عا جۋىق ستۋدەنت ءبىلىم الۋدا. سونداي-اق 22 ماگيسترلىك جانە 4 دوكتورانتۋرا ماماندىقتارى بويىنشا كادرلار دايىندالادى.
