وبلىس اكىمى مارات احمەتجانوۆ كوكشەتاۋ قالاسى بويىنشا جۇمىس ساپارى اياسىندا جەرگىلىكتى كومپانيالاردىڭ ينۆەستيتسيالارى ەسەبىنەن سالىنىپ جاتقان بىرقاتار الەۋمەتتىك نىسانداردى ارالادى.
ءبىرىنشى نىسان ەلەۆاتور اۋدانىنداعى كوكتەمگى سۋ تاسقىنى كەزىندە سۋ باسقان ۇيلەر بولدى.
وبلىس اكىمى م.م.احمەتجانوۆ «مەيىر» جشس مەردىگەرلىك ۇيىمىنىڭ اپاتتى تۇرعىن ۇيلەردى بۇزۋ جۇمىسىمەن تانىستى. جالپى العاندا زارداپ شەككەن 64 ءۇي بۇزىلماق. ەستەرىڭىزگە سالا كەتەيىك، سۋ باسقان ۇيلەردىڭ تۇرعىندارى بۇدان بۇرىن جاڭا پاتەرلەرگە كوشكەن ەدى.
«اۋماقتى تازالاپ، وسى ۇيلەردىڭ ورنىنا نە سالۋ قاجەت ەكەنىن ويلاستىرۋ كەرەك. ەڭ الدىمەن، جاقىن ماڭداعى № 8 ورتا مەكتەپتىڭ مۇددەلەرىن ەسكەرگەن ءجون. ماسەلەن، وقۋ ورنىنىڭ سپورت الاڭىن كەڭەيتۋگە بولادى. بۇل جەر قازىر مەملەكەتتىك قورعا ءوتىپ جاتقانىن ەسكەرسەك، اباتتاندىرۋمەن دە اينالىسۋ قاجەت»، - دەدى اكىم.
سونداي-اق، ءوڭىر باسشىسى قىلشاقتى وزەنىن تازارتۋ بارىسىمەن تانىسىپ، مەكتەپكە جاقىن ماڭدا سالىنعان جاڭا كوپىردى تەكسەردى. ەسكى كوپىر بيىلعى تاسقىننىڭ سالدارىنان جارامسىز بولىپ قالعان ەدى. ەستەرىڭىزگە سالا كەتەيىك، مامانداندىرىلعان ۇيىمدار قىلشاقتى وزەنىنىڭ قاۋىپتى ايماقتارىندا ىزدەستىرۋ جۇمىستارىن جۇرگىزدى. ناتيجەسىندە سۋ دەڭگەيىن كوتەرۋ جانە سۋ قويماسىنىڭ گيدرولوگيالىق رەجيمىن جاقسارتۋ ءۇشىن ۇزىندىعى شامامەن 4 كم وزەن اڭعارىن تازارتۋ تۋرالى شەشىم قابىلداندى.
مەردىگەر – «Qazaq Union» جشس-ءنىڭ ايتۋىنشا، قىلشاقتى وزەنىن تازارتۋ جۇمىستارى 5 تامىزدا باستالعان.
«جۇرگىزىلىپ جاتقان جۇمىس – سۋ تاسقىنىنىڭ الدىن الۋ بويىنشا ءبىرىنشى كەزەكتەگى شارا. قوس جاعالاۋدى ساپالى تازارتىپ قانا قويماي، نىعايتۋ جۇمىستارىن دا ەسكەرۋ قاجەت»، - دەپ اتاپ ءوتتى وبلىس اكىمى.
«بارلىق جۇمىستار ۋاقىتىلى ورىندالادى. ۇيلەردى بۇزۋ اياقتالعاننان كەيىن، جاڭا الەۋمەتتىك نىسانداردى بەكىتۋ ءۇشىن باس جوسپار قاراستىرىلادى. كوپىردى قايتا قۇرۋ تۋرالى ايتاتىن بولساق: بۇل جۇمىستاردى «سەرۆيس نس» جشس مەردىگەر ۇيىمى اتقاردى. كوپىردىڭ ۇزىندىعى 45 مەتر، جاياۋ جۇرگىنشىلەر بولىگىنىڭ ەنى 4 مەتر، ەكى جارىقتاندىرۋ تىرەگى جانە سەگىز شام ورناتىلدى»، - دەپ اتاپ ءوتتى كوكشەتاۋ قالاسى اكىمىنىڭ ورىنباسارى د.ك.ءجۇنىسوۆ
سونىمەن قاتار، قىلشاقتى وزەنىنىڭ بويىندا اباي كوشەسىندەگى اۆتوموبيل كوپىرىنەن سۇلەيمەنوۆ كوشەسىندەگى جاياۋ جۇرگىنشىلەر كوپىرىنە دەيىن تاعى ءبىر اللەيا پايدا بولدى. «بالىقشى اللەياسىنىڭ» باستاماشىسى كوكشەتاۋ قالالىق ءماسليحاتىنىڭ دەپۋتاتى رۇستەم تۇرجانوۆ بولدى.
«بۇل اللەيادا «Home Credit Bank» دەمەۋشىلىك قاراجاتى ەسەبىنەن كۇن باتارەيالارىندا جۇمىس ىستەيتىن 12 جارىقديودتى شام، ورىندىقتار مەن اتكەنشەكتەر ورناتىلدى. كوكشەتاۋ قالالىق ءماسليحاتىنىڭ دەپۋتاتتىق كورپۋسىمەن بىرلەسىپ جابايى الما اعاشىنىڭ كوشەتتەرى وتىرعىزىلدى»، - دەدى «بۋكا» جشس ديرەكتورى ر.ە.تۇرجانوۆ.
ايتا كەتەيىك، بۇل جوبا كوكشەتاۋ قالاسىنىڭ «بۋكا»، «Qazaq Union»، «الما-ميكس»، «ەنەرگوپرومتەحنو» سەرىكتەستىكتەرىنىڭ جانە Home Credit Bank باستاعان الەۋمەتتىك بەلسەندى بيزنەس قايراتكەرلەرىنىڭ دەمەۋشىلىك قاراجاتى ەسەبىنەن سۋ تاسقىنىنىڭ الدىن الۋ شەڭبەرىندە ىسكە اسىرىلدى.
وعان قوسا، ءوڭىر باسشىسى شالقار كوشەسىندەگى سالقىن سالدىرىن جويۋ اياسىندا قولعا الىنعان اۋلا اۋماقتارىن كۇردەلى جوندەۋ جۇمىستارىنىڭ بارىسىمەن تانىستى.
«اتقارىلعان جۇمىستار ينفراقۇرىلىمدى جاقسارتۋعا جانە تۇرعىندار ءۇشىن قولايلى جاعداي جاساۋعا باعىتتالۋى ءتيىس. توتەنشە جاعدايدىڭ قايتالانباۋى ءۇشىن بارلىق وڭ جانە تەرىس جاقتارىن ەسكەرۋ قاجەت»، - دەپ اتاپ ءوتتى مارات احمەتجانوۆ.
تاعى ءبىر سالىنىپ جاتقان نىسان – قوپا كولىنىڭ بويىنداعى قان ورتالىعىنان كەنەسارى كوشەسىنە دەيىنگى جول. بۇل ۋچاسكەدەگى جۇمىستى «ابك اۆتودور نس» جشس مەردىگەرلىك ۇيىمى جۇرگىزەدى. قازىرگى ۋاقىتتا مەردىگەر كوپىردەن ورتالىق بازارعا دەيىنگى جولدى جوندەۋگە كىرىستى.
«ۋچاسكەدە قارا قيىرشىق تاستان جاسالعان نەگىزدىڭ جوعارعى قاباتىن توسەۋ جۇمىستارى جۇرگىزىلۋدە. ورىندالعان جۇمىستاردىڭ جالپى كولەمى 8 500 شارشى مەتر»، – دەدى «ابك-اۆتودور نس» جشس جوبا جەتەكشىسى ازامات بىرسەيىتوۆ.
ايتا كەتەيىك، جوبادا 2 جاقتى جارىقتاندىرۋ، ەكى جاعىنان تروتۋار، ءبىر جاعىنان ۆەلوسيپەد جولى، سۋ بۇرۋ ناۋالارى، باعدارشام نىساندارىمەن قيىلىستاردى جايلاستىرۋ جانە كوگالداندىرۋ قاراستىرىلعان. جۇمىستاردى 10 اي ىشىندە اياقتاۋ جوسپارلانۋدا.
«بۇل نىساندا ءبارى كەلىسىلۋى كەرەك. قازىر مىندەت-دەمالىس ايماقتارىن، سپورت الاڭدارىن، پيرستەردى سالۋ ءۇشىن اۋماقتى دايىنداۋ. بارلىعى وبلىس ورتالىعىنىڭ كەلبەتىنە ساي بولۋى كەرەك. سونىمەن قاتار، كوكشەتاۋ كولى بار جالعىز وبلىس ورتالىعى ەكەنىن ۇمىتپاعان ءجون»، - دەپ تۇيىندەدى مارات احمەتجانوۆ.
