Oblys ákimi Marat Ahmetjanov Kókshetaý qalasy boıynsha jumys sapary aıasynda jergilikti kompanııalardyń ınvestıııalary esebinen salynyp jatqan birqatar áleýmettik nysandardy aralady.
Birinshi nysan Elevator aýdanyndaǵy kóktemgi sý tasqyny kezinde sý basqan úıler boldy.
Oblys ákimi M.M.Ahmetjanov «Meıir» JShS merdigerlik uıymynyń apatty turǵyn úılerdi buzý jumysymen tanysty. Jalpy alǵanda zardap shekken 64 úı buzylmaq. Esterińizge sala keteıik, sý basqan úılerdiń turǵyndary budan buryn jańa páterlerge kóshken edi.
«Aýmaqty tazalap, osy úılerdiń ornyna ne salý qajet ekenin oılastyrý kerek. Eń aldymen, jaqyn mańdaǵy № 8 orta mekteptiń múddelerin eskergen jón. Máselen, oqý ornynyń sport alańyn keńeıtýge bolady. Bul jer qazir memlekettik qorǵa ótip jatqanyn eskersek, abattandyrýmen de aınalysý qajet», - dedi ákim.
Sondaı-aq, óńir basshysy Qylshaqty ózenin tazartý barysymen tanysyp, mektepke jaqyn mańda salynǵan jańa kópirdi tekserdi. Eski kópir bıylǵy tasqynnyń saldarynan jaramsyz bolyp qalǵan edi. Esterińizge sala keteıik, mamandandyrylǵan uıymdar Qylshaqty ózeniniń qaýipti aımaqtarynda izdestirý jumystaryn júrgizdi. Nátıjesinde sý deńgeıin kóterý jáne sý qoımasynyń gıdrologııalyq rejımin jaqsartý úshin uzyndyǵy shamamen 4 km ózen ańǵaryn tazartý týraly sheshim qabyldandy.
Merdiger – «Qazaq Union» JShS-niń aıtýynsha, Qylshaqty ózenin tazartý jumystary 5 tamyzda bastalǵan.
«Júrgizilip jatqan jumys – sý tasqynynyń aldyn alý boıynsha birinshi kezektegi shara. Qos jaǵalaýdy sapaly tazartyp qana qoımaı, nyǵaıtý jumystaryn da eskerý qajet», - dep atap ótti oblys ákimi.
«Barlyq jumystar ýaqytyly oryndalady. Úılerdi buzý aıaqtalǵannan keıin, jańa áleýmettik nysandardy bekitý úshin bas jospar qarastyrylady. Kópirdi qaıta qurý týraly aıtatyn bolsaq: bul jumystardy «Servıs NS» JShS merdiger uıymy atqardy. Kópirdiń uzyndyǵy 45 metr, jaıaý júrginshiler bóliginiń eni 4 metr, eki jaryqtandyrý tiregi jáne segiz sham ornatyldy», - dep atap ótti Kókshetaý qalasy ákiminiń orynbasary D.K.Júnisov
Sonymen qatar, Qylshaqty ózeniniń boıynda Abaı kóshesindegi avtomobıl kópirinen Súleımenov kóshesindegi jaıaý júrginshiler kópirine deıin taǵy bir alleıa paıda boldy. «Balyqshy alleıasynyń» bastamashysy Kókshetaý qalalyq máslıhatynyń depýtaty Rústem Turjanov boldy.
«Bul alleıada «Home Credit Bank» demeýshilik qarajaty esebinen kún batareıalarynda jumys isteıtin 12 jaryqdıodty sham, oryndyqtar men átkenshekter ornatyldy. Kókshetaý qalalyq máslıhatynyń depýtattyq korpýsymen birlesip jabaıy alma aǵashynyń kóshetteri otyrǵyzyldy», - dedi «Býka» JShS dırektory R.E.Turjanov.
Aıta keteıik, bul joba Kókshetaý qalasynyń «Býka», «Qazaq Union», «Alma-Mıks», «EnergoPromTehno» seriktestikteriniń jáne Home Credit Bank bastaǵan áleýmettik belsendi bıznes qaıratkerleriniń demeýshilik qarajaty esebinen sý tasqynynyń aldyn alý sheńberinde iske asyryldy.
Oǵan qosa, óńir basshysy Shalqar kóshesindegi salqyn saldyryn joıý aıasynda qolǵa alynǵan aýla aýmaqtaryn kúrdeli jóndeý jumystarynyń barysymen tanysty.
«Atqarylǵan jumystar ınfraqurylymdy jaqsartýǵa jáne turǵyndar úshin qolaıly jaǵdaı jasaýǵa baǵyttalýy tıis. Tótenshe jaǵdaıdyń qaıtalanbaýy úshin barlyq oń jáne teris jaqtaryn eskerý qajet», - dep atap ótti Marat Ahmetjanov.
Taǵy bir salynyp jatqan nysan – Qopa kóliniń boıyndaǵy Qan ortalyǵynan Kenesary kóshesine deıingi jol. Bul ýchaskedegi jumysty «ABK Avtodor NS» JShS merdigerlik uıymy júrgizedi. Qazirgi ýaqytta merdiger kópirden ortalyq bazarǵa deıingi joldy jóndeýge kiristi.
«Ýchaskede qara qıyrshyq tastan jasalǵan negizdiń joǵarǵy qabatyn tóseý jumystary júrgizilýde. Oryndalǵan jumystardyń jalpy kólemi 8 500 sharshy metr», – dedi «ABK-Avtodor NS» JShS joba jetekshisi Azamat Birseıitov.
Aıta keteıik, jobada 2 jaqty jaryqtandyrý, eki jaǵynan trotýar, bir jaǵynan velosıped joly, sý burý naýalary, baǵdarsham nysandarymen qıylystardy jaılastyrý jáne kógaldandyrý qarastyrylǵan. Jumystardy 10 aı ishinde aıaqtaý josparlanýda.
«Bul nysanda bári kelisilýi kerek. Qazir mindet-demalys aımaqtaryn, sport alańdaryn, pırsterdi salý úshin aýmaqty daıyndaý. Barlyǵy oblys ortalyǵynyń kelbetine saı bolýy kerek. Sonymen qatar, Kókshetaý kóli bar jalǵyz oblys ortalyǵy ekenin umytpaǵan jón», - dep túıindedi Marat Ahmetjanov.
