ارىستاعى اپاتتان كەيىن ارىس اكىمىنەن باستاپ، وبلىس اكىمى دە، ۇكىمەت تە، پرەزيدەنت تە ارىستىقتارعا ۇيلەرىن قايتا سالىپ بەرۋگە، حالىقتىڭ كوڭىلى تولعانشا بارلىق جاعدايىن جاساۋعا ۋادە بەرگەن ەدى.
ەندى بارىنشا حالىقتى الداپ-سۋلاۋعا كوشكەن سىڭايلى. "و باستا ۇيلەرىڭ ساپاسىز سالىنعان... سامان ۇيلەرىڭ قيراسا، وزدەرىڭ كىنالىسىڭدەر... قورا-جاي تۋرالى اۋىز دا اشپاڭدار..." دەپ بار كىنانى حالىقتىڭ وزىنە اۋدارۋعا تىرىسىپ باعۋدا.
ارىق سويلەپ، سەمىز شىققان جاقسى عوي...
قام قىش پا، لاي كىرپءىش پە، كۇيگەن كىرپىش پە - جەكە مۇلىكتى قيراتقان ادام قالپىنا كەلتىرۋگە مىندەتتى. بۇل ورايدا مەملەكەتتىڭ - جاۋاپتى قىزمەتكەرلەردىڭ سالعىرتتىعىنان 45 مىڭ حالىق ۇيلەرىن تاستاپ، بوسىپ كەتتى. دەنساۋلىقتارىنا دا، جەكە مۇلىكتەرىنە دە وراسان زور زيان كەلدى. ەندى سونىڭ ءبارىنىڭ دە وتەۋى بولۋ كەرەك. جانە ءبىر ەمەس، 4 رەت وسىنداي وقيعا بولعاندىقتان، ودان بولەك، جوسپارلى، زالالسىزداندىرۋ ماقساتىندا ءجيى بولىپ تۇراتىن جارىلىستار دا بەلگىلى ءبىر مولشەردە حالىققا مورالدىق، پسيحولوگيالىق، ماتەريالدىق شىعىن كەلتىرەتىنىن ەسكەرۋىمىز كەرەك. ء"ار جارىلىس بولعان سايىن جۇرەگىمىز سۋىلداپ، بالالارىمىز "سوعىس باستالدى، اپا، قاشايىق..." دەيدى، جارىلىستان جەر سىلكىنىسى بولادى، ۇيلەردىڭ تەرەزەلەرى سىقىرلاپ، ليۋسترالار تەڭسەلەدى، ءار جارىلىس بولعان سايىن ءۇيىمىزدىڭ قابىرعالارىنا جارىق سىزىق تۇسەدى..." دەيدى. ياعني، "و باستان ءۇيىڭ ساماننان سالىنعان، ساپاسىز سالىنعان" دەپ سىلتاۋراتپاي، حالقىنا 21 عاسىرعا ساي ءۇي سالىپ بەرۋ بيلىكتىڭ مىندەتى. حالىق قايبىر جەتىسكەننەن سالادى سامان ءۇيدى؟ جوقتىقتان سالادى. ال حالىقتىڭ 30 جىل بويى ەڭسەسىن كوتەرە الماي، جوقشىلىققا دۋشار بولۋىنا ەڭ الدىمەن كىم كىنالى؟ جاۋابى بەلگىلى... سوندىقتان حالىق الدىندا بيلىك ءوز قاتەلىگىن ءوزى تۇزەتۋگە ءتيىستى.
ساۋلە ابىلداحانقىزى
"ادىرنا" ۇلتتىق پورتالى
