وسكەمەن-الماتى پويىزىندا 74 جاستاعى زەينەتكەر قايتىس بولدى. بۇل تۋرالى پوليتسيا دەپارتامەنتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
قايعىلى وقيعانى جولاۋشىلاردىڭ ءبىرى الەۋمەتتىك جەلىدە جاريالادى. ايتۋىنشا، پويىزدا وتە ىستىق بولعان.
«اتاسى ايەلىمەن بىرگە تامبۋرعا شىعىپ، اۋا جەتپەي قۇلاپ، قايتىس بولدى. مۇنىڭ ءبارى 13 جاسار نەمەرەسىنىڭ كوزىنشە بولعان. جولسەرىكتە العاشقى مەديتسينالىق كومەك كورسەتۋ قوبديشاسى بولماعان. سارىوزەك ستانساسىنا جەتكەن جەدەل جاردەم ءمايىتتى كورپەمەن الىپ كەتتى. زەمبىل بولعان جوق»، - دەپ ءبولىستى جولاۋشى.
پوليتسيا دەپارتامەنتى ەر ادامنىڭ ولىمىنە قاتىستى تەرگەۋدى باستادى.
«قوناەۆ ستانساسىنداعى جەرگىلىك پوليتسيا ءبولىمى وسكەمەن-الماتى باعىتىنداعى جولاۋشىلار پويىزىندا كەنەتتەن قايتىس بولعان وقيعا بويىنشا سوتقا دەيىنگى تەرگەۋ امالدارىن باستادى. تەرگەۋ جۇرگىزىلۋدە»، - دەپ جاۋاپ بەردى دەپارتامەنتتىڭ ءباسپاسوز قىزمەتى.
«جولاۋشىلار تاسىمالى» اق سارىوزەك ستانتسياسىندا №351 وسكەمەن-الماتى پويىزىنىڭ باستىعى دەنساۋلىعىنىڭ كۇرت ناشارلاۋىنا بايلانىستى 74 جاستاعى جولاۋشىعا جەدەل جاردەم شاقىرعانىن حابارلادى.
«پويىز جولسەرىكتەرى جولاۋشىلارمەن جانە مەديتسينا قىزمەتكەرلەرىمەن بىرگە العاشقى مەديتسينالىق كومەك كورسەتۋ ءۇشىن بارلىق شارالاردى قابىلدادى. وكىنىشكە وراي، جەدەل جاردەم بريگاداسى جولاۋشىنىڭ قايتىس بولعانىن حابارلادى. جولاۋشى كوندۋكتورعا دەنساۋلىعىنىڭ ناشارلاعانىنا شاعىمدانباعان. جولاۋشى ايەلىمەن بىرگە جارعىز-توبە ستانتسياسىنان الماتىعا بەت العان. ايەلىنىڭ ايتۋىنشا، ەر ادام استمامەن اۋىرادى. ۇلتتىق تاسىمالداۋشى جولاۋشىنىڭ وتباسىنا كوڭىل ايتادى»، - دەلىنگەن قتج حابارلاماسىندا.
