26 شىلدەدە ەكولوگيا جانە تابيعي رەسۋرستار مينيسترلىگىندە «ەرتىس ورمانى» مەملەكەتتىك ورمان تابيعي رەزەرۆاتىنىڭ لاۋازىمدى تۇلعالارىنا قاتىستى ءىس بويىنشا ۇسىنىستار قارالدى. بۇل تۋرالى انتيكوردىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«رەزەرۆاتتىڭ باس ديرەكتورى باسشىلىق ەتكەن قىلمىستىق توپ اعاشتى تەحنولوگيالىق جانە وتىن اعاشىنىڭ تۇرىندە زاڭسىز ساتۋ ارقىلى اسا ءىرى مولشەردە ورمان اعاشىن جىمقىردى دەپ كۇدىكتەلىپ وتىر. قىلمىستىق ارەكەت ناتيجەسىندە مەملەكەتكە 150 ملن تەڭگەدەن استام سومادا زالال كەلتىرىلدى. قازىرگى تاڭدا ۇقت قاتىسۋشىلارى قاماۋدا. سوتقا دەيىنگى تەرگەۋ اياقتالدى. جۇمىس جالعاسادى»،— دەلىنگەن حابارلامادا.
بۇعان دەيىن «ەرتىس ورمانى» مەملەكەتتىك ورمان تابيعي رەزەرۆاتى باسشىسى ارمان بەكتەمىروۆتىڭ پارا الدى دەگەن كۇدىككە ىلىنگەنىن جازعان ەدىك.
