مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان «تازا قازاقستان» رەسپۋبليكالىق ەكولوگيالىق اكتسياسى اياسىندا بۋراباي كۋرورتىنداعى ابىلاي حان الاڭىندا رەسپۋبليكالىق پلوگگينگ ءوتتى.
پلوگگينگ ەكى زاماناۋي تەندەنتسيانى بىرىكتىرەدى-سالاۋاتتى ءومىر سالتىن قالىپتاسىرۋدى ناسيحاتتاۋ جانە قورشاعان ورتاعا قامقورلىق. ونى جالعىز جانە توپپەن جاساي الاسىز: جۇگىرۋگە شىققاندا، قوقىس پاكەتىن وزىڭىزبەن بىرگە الىپ، جۇگىرىپ كەلە جاتقاندا، وعان جول بويىنداعى قوقىستاردى جيناڭىز. مىنە، سوڭعى جىلدارى الەمنىڭ كوپتەگەن ەلدەرىندە قىزىعۋشىلىق ارتىپ كەلە جاتقان پلوگگينگ قازاقستاندا دا كەڭىنەن قانات جايا باستادى.
ۇيىمداستىرۋشىلاردىڭ ايتۋىنشا، قر مادەنيەت جانە اقپارات مينيسترلىگى مەن وبلىستىق ىشكى ساياسات باسقارماسى بىرلەسىپ وتكىزگەن شارانىڭ ماقساتى – بۋراباي اۋدانى تۇرعىندارى مەن تۋريستەرىنىڭ، اسىرەسە جاستاردىڭ ەكولوگيالىق مادەنيەتىن ارتتىرۋ، پاتريوتيزم قۇندىلىقتارىن ناسيحاتتاۋ، «ادال ادام-ادال ەڭبەك-ادال تابىس» تۇجىرىمداماسى نەگىزىندە تابيعاتقا، قورشاعان ورتاعا ۇقىپتى قاراۋ بولىپ تابىلادى.
دەنساۋلىق پەن ەكولوگياعا پايدالى ۋاقىت وتكىزۋ ءۇشىن بۋرابايدا ءۇش جۇزگە جۋىق ادام جينالدى، ولاردىڭ اراسىندا قر مادەنيەت جانە اقپارات مينيسترلىگىنىڭ، اقمولا وبلىسى اكىمدىگىنىڭ، ازاماتتىق سەكتوردىڭ وكىلدەرى، «امانات» پارتياسى جانىنداعى «جاستار رۋحى» رەسپۋبليكالىق جاستار قاناتى، قازاقستان ستۋدەنتتەر اليانسى، بۋراباي، بۇلاندى جانە ءبىرجان سال اۋداندارىنىڭ جاستار رەسۋرستىق ورتالىقتارىنىڭ بەلسەندىلەرى، ستۋدەنتتەر مەن ەرىكتىلەر قاتىستى.
اقمولا وبلىسىنىڭ ىشكى ساياسات باسقارماسى باسشىسىنىڭ ورىنباسارى جانداۋلەت قىلىشباەۆ ەكولوگيالىق اكتسياسىنا قاتىسۋشىلاردى قۇتتىقتاپ، بەلسەندىلىكتەرى ءۇشىن العىسىن ايتتى. ول ءوز سوزىندە «تازا قازاقستان» ۇزاق مەرزىمدى اكتسياسىنا اقمولالىقتار ءبىرىنشى كۇننەن باستاپ بەلسەندى قاتىسىپ كەلە جاتقانىن اتاپ ءوتتى.
پلوگگينگكە قاتىسۋشىلار ەكى توپقا ءبولىندى، ءبىرىنشىسى ابىلاي حان الاڭىنداعى قوقىستاردى جيناسا، ەكىنشىسى بۋراباي كولىنىڭ جاعاسىن قوقىستان تازارتتى.
جالپى، «تازا قازاقستان» ەكولوگيالىق اكتسياسى باستالعان ساتتەن باستاپ اقمولا وبلىسىندا 550-دەن استام ەلدى مەكەن قامتىلىپ، بىرنەشە ءجۇز توننا توننا جينالىپ، پوليگوندارعا جونەلتىلدى. اكتسيانىڭ تاقىرىپتىق اپتالارىندا تاريحي-مادەني ەسكەرتكىشتەردىڭ اۋماعى اباتتاندىرىلدى، اعاشتار مەن بۇتالار وتىرعىزىلدى، وزەندەر مەن كولدەردىڭ اينالاسى قوقىستاردان تازارتىلدى، بالالار ويىن الاڭدارى رەتكە كەلتىرىلدى، تۇرعىن ۇيلەر مەن باسقا دا عيماراتتاردىڭ قاسبەتتەرى جوندەلدى.
اقمولا وبلىسىنىڭ ىشكى ساياسات باسقارماسىندا اتاپ وتكەندەي، ءساۋىر ايىنان باستاپ وڭىردە بارلىعى 3,5 مىڭعا جۋىق اۋماقتى اباتتاندىرۋ جانە تازالاۋ شارالارى وتكىزىلدى، وعان كەمىندە 500 مىڭ اقمولالىق قاتىستى.
