كريمينالدى ايماق قاشان رەتتەلەدى، اكىمدەر؟!

5514
Adyrna.kz Telegram

قر پرەزيدەنتى قاسىم-جومارت توقاەۆتىڭ، الماتى قالاسىنىڭ اكىمى باقىتجان ساعىنتاەۆتىڭ، الماتى وبلىسىنىڭ اكىمى اماندىق باتالوۆتىڭ نازارىنا!  

باقىتجان ساعىنتاەۆ، اماندىق باتالوۆ، «التىن وردا» بازارىنىڭ قاسىنداعى، اپورت ساۋدا ورتالىعىنىڭ ارتىنداعى ەلدىمەكەن قازىر ناعىز قىلمىستىڭ ورداسىنا اينالدى. مۇندا ادام توناۋ، ۇرلىق-قارلىق، توپ بولىپ توبەلەسۋ، قىز زورلاۋ، ادام ءولتىرۋ فاكتىلەرى تىم جيىلەپ كەتتى. بۇگىندە حالىق بۇل جاقتى 13-ءشى رايون، ياعني «كريمينالدى ايماق» دەپ اتايتىن بولدى. جۇرتشىلىق اراسىندا وسى «بۇزاقى ايماق» اتانعان اۋىلعا قاشان كوڭىل بولەسىزدەر، اكىمدەر!

وسىدان بەس-التى جىل بۇرىن قىلمىس ءورشىپ، تەررورلىق ارەكەتتەر ورىن العاندىقتان، وبلىسقا قارايتىن ءبىراز اۋىلدار الماتى قالاسىنا قوسىلىپ ەدى. بىراق ءبىز قازىر نە اۋىلعا، نە قالاعا قارايتىنىمىزدى بىلمەي، ورتادا قالدىق. ءبىز قۇجات بويىنشا قاراساي اۋدانى، ىرگەلى اۋىلىنا قاراعانىمىزبەن، بىزگە سۋ «الماتى سۋ» كومپانياسىنان بەرىلىپ وتىر. بۇل جەر قالانىڭ تەرريتورياسى دەپ ايتىلادى. دەگەنمەن جەدەل-جاردەم شاقىرساق، بىزگە قالقاماننان دا، قاراساي اۋدانىنان دا ەشكىم كەلمەيدى. قالقامان اۋرۋحاناسى: «سەندەر قاراساي اۋدانىنا قارايسىڭدار» دەيدى، ال قاراساي اۋدانى: «جوق، سەندەر قالاعا قوسىلعانسىڭدار» دەپ، ءبىر-بىرىنە سىلتەيدى. وسىلايشا، ءبىز قازىر نە اۋىلعا، نە قالاعا كىرگەنىمىزدى بىلمەيمىز. نە اندا، نە مۇندا جوقپىز، بەيتاراپ قالدىق. بىزگە قارايتىن بىردە-ءبىر اكىم جوق.

اكىمدەر! اماندىق باتالوۆ، باقىتجان ساعىنتاەۆ، ەل اراسىندا 13-ءشى رايون اتالىپ كەتكەن الماتىنىڭ ءدال ىرگەسىندەگى «كريمينالدى ايماق» حالقى قازىر جارىق، سۋ، جول ازابىن تارتىپ وتىر. مۇندا 15 جىلدان بەرى ءالى ەشقانداي ماسەلە شەشىلگەن جوق. ءتىپتى اۋىل كوشەلەرىنە اتاۋ دا بەرىلمەگەن. كوشەنىڭ اتى بولماعان سوڭ، جەدەل-جاردەم، ءورت ءسوندىرۋ قىزمەتىن شاقىرساق، ولار قايدا بارارىن بىلمەيدى. اداسادى. ولار كەلەم دەگەنشە، ادام ءولىپ، جانعان ءۇيدىڭ تۇگى قالمايدى. كوشەلەرگە جارىق ورناتىلماي، تاس قاراڭعى بولعان سوڭ، مۇندا ۇرلىق، توناۋ كوپ. پوليتسيا كەلمەيدى. ۋچاسكەلىك پوليتسيا دەگەن اتىمەن جوق. مەكتەپ تە سالىنباعان. اكىمدەر، سۋدى، جارىقتى، جولدى قاشان جاسايسىزدار؟ كوشەمىز جازدا – شاڭ-توپىراق، كوكتەم-كۇزدە – مي باتپاققا اينالادى. الاتاۋ اۋدانىنىڭ اكىمى شاحمەردەن رىسپاەۆتىڭ، قاراساي اۋدانىنىڭ اكىمى جانداربەك دالاباەۆتىڭ، ءتىپتى اۋىل اكىمىنىڭ دە بۇل جاققا ءومىرى اياعى تيمەگەن. ولار وسى ۋاقىتقا دەيىن «جانى اشىماستىڭ قاسىندا باسىڭ اۋىرماسىننىڭ» كەرىن كەلتىرىپ وتىر. ايتپەسە، بۇل جاقتاعى ۇلكەن جول قالاعا قارايدى، بىراق ول ءومىرى جوندەۋ كورگەن جوق.

بالالارىمىز مىنا شاڭ-توزاڭ، مي باتپاقتىڭ اراسىنان سوناۋ 7-8 شاقىرىم جەردەگى مەكتەپكە جاياۋ بارۋعا ءماجبۇر. ونىڭ ۇستىنە، مۇندا جابايى يتتەر قاپتاپ كەتكەن. يەسىز يتتەردەن بالالار تۇرماق، ۇلكەن ادامدار كوشەدە جۇرۋگە قورقادى. جولدىڭ قيامەتىن ايتىپ، قۇزىرلى ورگاندارعا قانشا شاعىمدانعانىمىزبەن، قۇلاق اسار ەشكىم جوق.

وكىنشتىسى سول، بىزدە ىرگەلى اۋىلىنىڭ اكىمى قادىربەك اتشاباروۆتىڭ ۇيىنە باراتىن جول تاقتايداي تەپ-تەگىس، اسفالت توسەلگەن. ءتىپتى ءوزى تۇراتىن كوشەگە اكىمنىڭ اتاسى اتشاباردىڭ ەسىمى بەرىلگەن. ال بىزدە جول تۇرماق، كوشەنىڭ اتى جوق. وسى ادىلدىك پە؟

جاقىندا قر پرەزيدەنتى قاسىم-جومارت توقاەۆ بارلىق اكىمدەرگە الەۋمەتتىك جەلىدەگى تۇرعىندار سۇراعىنا جاۋاپ بەرۋىن مىندەتتەگەن بولاتىن. سوندىقتان باقىتجان ساعىنتاەۆ، شاحمەردەن رىسپاەۆ، اماندىق باتالوۆ، جانداربەك دالاباەۆ 13-ءشى رايون، «كريمينالدى ايماقتىڭ» ماسەلەسى ناقتى قاشان شەشىلەتىنىن زاڭدا بەلگىلەنگەن مەرزىمدە بىزگە جازباشا تۇردە بەرۋلەرىڭىزدى سۇرايمىز!

 

اۋىل تۇرعىندارى

"ادىرنا" ۇلتتىق پورتالى

پىكىرلەر