QR Prezıdenti Qasym-Jomart Toqaevtyń, Almaty qalasynyń ákimi Baqytjan Saǵyntaevtyń, Almaty oblysynyń ákimi Amandyq Batalovtyń nazaryna!
Baqytjan Saǵyntaev, Amandyq Batalov, «Altyn orda» bazarynyń qasyndaǵy, Aport saýda ortalyǵynyń artyndaǵy eldimeken qazir naǵyz qylmystyń ordasyna aınaldy. Munda adam tonaý, urlyq-qarlyq, top bolyp tóbelesý, qyz zorlaý, adam óltirý faktileri tym jıilep ketti. Búginde halyq bul jaqty 13-shi raıon, ıaǵnı «krımınaldy aımaq» dep ataıtyn boldy. Jurtshylyq arasynda osy «buzaqy aımaq» atanǵan aýylǵa qashan kóńil bólesizder, ákimder!
Osydan bes-alty jyl buryn qylmys órship, terrorlyq áreketter oryn alǵandyqtan, oblysqa qaraıtyn biraz aýyldar Almaty qalasyna qosylyp edi. Biraq biz qazir ne aýylǵa, ne qalaǵa qaraıtynymyzdy bilmeı, ortada qaldyq. Biz qujat boıynsha Qarasaı aýdany, Irgeli aýylyna qaraǵanymyzben, bizge sý «Almaty sý» kompanııasynan berilip otyr. Bul jer qalanyń terrıtorııasy dep aıtylady. Degenmen jedel-járdem shaqyrsaq, bizge Qalqamannan da, Qarasaı aýdanynan da eshkim kelmeıdi. Qalqaman aýrýhanasy: «Sender Qarasaı aýdanyna qaraısyńdar» deıdi, al Qarasaı aýdany: «joq, sender qalaǵa qosylǵansyńdar» dep, bir-birine silteıdi. Osylaısha, biz qazir ne aýylǵa, ne qalaǵa kirgenimizdi bilmeımiz. Ne anda, ne munda joqpyz, beıtarap qaldyq. Bizge qaraıtyn birde-bir ákim joq.
Ákimder! Amandyq Batalov, Baqytjan Saǵyntaev, el arasynda 13-shi raıon atalyp ketken Almatynyń dál irgesindegi «krımınaldy aımaq» halqy qazir jaryq, sý, jol azabyn tartyp otyr. Munda 15 jyldan beri áli eshqandaı másele sheshilgen joq. Tipti aýyl kóshelerine ataý da berilmegen. Kósheniń aty bolmaǵan soń, jedel-járdem, órt sóndirý qyzmetin shaqyrsaq, olar qaıda bararyn bilmeıdi. Adasady. Olar kelem degenshe, adam ólip, janǵan úıdiń túgi qalmaıdy. Kóshelerge jaryq ornatylmaı, tas qarańǵy bolǵan soń, munda urlyq, tonaý kóp. Polıııa kelmeıdi. Ýchaskelik polıııa degen atymen joq. Mektep te salynbaǵan. Ákimder, sýdy, jaryqty, joldy qashan jasaısyzdar? Kóshemiz jazda – shań-topyraq, kóktem-kúzde – mı batpaqqa aınalady. Alataý aýdanynyń ákimi Shahmerden Ryspaevtyń, Qarasaı aýdanynyń ákimi Jandarbek Dalabaevtyń, tipti aýyl ákiminiń de bul jaqqa ómiri aıaǵy tımegen. Olar osy ýaqytqa deıin «jany ashymastyń qasynda basyń aýyrmasynnyń» kerin keltirip otyr. Áıtpese, bul jaqtaǵy úlken jol qalaǵa qaraıdy, biraq ol ómiri jóndeý kórgen joq.
Balalarymyz myna shań-tozań, mı batpaqtyń arasynan sonaý 7-8 shaqyrym jerdegi mektepke jaıaý barýǵa májbúr. Onyń ústine, munda jabaıy ıtter qaptap ketken. Iesiz ıtterden balalar turmaq, úlken adamdar kóshede júrýge qorqady. Joldyń qııametin aıtyp, quzyrly organdarǵa qansha shaǵymdanǵanymyzben, qulaq asar eshkim joq.
Ókinshtisi sol, bizde Irgeli aýylynyń ákimi Qadyrbek Atshabarovtyń úıine baratyn jol taqtaıdaı tep-tegis, asfalt tóselgen. Tipti ózi turatyn kóshege ákimniń atasy Atshabardyń esimi berilgen. Al bizde jol turmaq, kósheniń aty joq. Osy ádildik pe?
Jaqynda QR PRezıdenti Qasym-Jomart Toqaev barlyq ákimderge áleýmettik jelidegi turǵyndar suraǵyna jaýap berýin mindettegen bolatyn. Sondyqtan Baqytjan Saǵyntaev, Shahmerden Ryspaev, Amandyq Batalov, Jandarbek Dalabaev 13-shi raıon, «krımınaldy aımaqtyń» máselesi naqty qashan sheshiletinin zańda belgilengen merzimde bizge jazbasha túrde berýlerińizdi suraımyz!
Aýyl turǵyndary
"Adyrna" ulttyq portaly
