پرەزيدەنت توقاەۆ پاريج وليمپياداسىنىڭ چەمپيونى ەلدوس سمەتوۆتى جەڭىسىمەن قۇتتىقتاپ، تەلەفون ارقىلى تىلدەستى، دەپ حابارلايدى “ادىرنا” ۇلتتىق پورتالى.
مەملەكەت باسشىسى قاسىم-جومارت توقاەۆ ەلدوس سمەتوۆكە تەلەفون شالىپ، ونى وليمپ شىڭىن باعىندىرۋىمەن قۇتتىقتادى.
“قازاقتىڭ رۋحىن، جالپى حالقىمىزدىڭ مىقتى مىنەزىن كورسەتتىڭ. ءبارىمىز سەنى ماقتان تۇتامىز. سوزىڭدە تۇردىڭ، تاماشا جەڭىسكە جەتتىڭ، ناعىز جىگىتسىڭ! سەن سياقتى جىگىتتەردىڭ ارقاسىندا تۋىمىز ارقاشاندا اسقاقتاپ، جەلبىرەي بەرسىن. جاڭا جەڭىستەرگە جەتە بەر. ساعان جانە وتباسىڭا امانشىلىق تىلەيمىن. استانادا كەزدەسكەنشە!” – دەدى پرەزيدەنت.
ودان بولەك مەملەكەت باسشىسى سپورتشىنى قۇتتىقتاپ، ح پاراقشاسىندا جازبا جاريالادى.
“دزيۋدوشىمىز ەلدوس سمەتوۆتى پاريجدەگى وليمپيادا ويىندارىندا التىن مەدال جەڭىپ الۋىمەن قۇتتىقتايمىن! ونىڭ شەبەرلىگى مەن قايسارلىعىنىڭ ارقاسىندا قازاقستاننىڭ تۋى بيىكتە جەلبىرەدى. ەلدوس مىقتى قارسىلاستارمەن كۇرەستە تورتجىلدىقتىڭ باستى دودالارىندا توپ جارىپ، الەمنىڭ ۇزدىگى اتاندى. ءسىزدىڭ جەڭىسىڭىز – ءبىزدىڭ بۇكىل حالقىمىزدىڭ جەڭىسى!” – دەپ جازدى پرەزيدەنت ح پاراقشاسىندا.
ايتا كەتەيىك، ەلدوس سمەتوۆ 27 شىلدەدە پاريج وليمپياداسىنىڭ العاشقى كۇندەرىنەن-اق ەل قورجىنىنا التىن مەدال سىيلادى.
