پاۆلودار وبلىسىندا زورلىق-زومبىلىق قۇربانى بولعان 12 جاستاعى قىزدىڭ بوسانۋى قالاي وتكەنى بەلگىلى بولدى، - دەپ حابارلايدى “ادىرنا” ۇلتتىق پورتالى.
بەلگىلى بولعانداي، 12 جاستاعى مەكتەپ وقۋشىسى كەسار تىلىگى ارقىلى بوسانىپ، قازىر سابيىمەن بىرگە اۋرۋحانادا جاتىر.
پاۆلودار وبلىسىنىڭ بالالار ومبۋدسمەنى تۇسىندىرگەندەي، كامەلەتكە تولماعان قىز تاربيەلەنىپ جاتقان كوپ بالالى وتباسى قازاقستانعا ءتورت جىل بۇرىن كوشىپ كەلگەن ەكەن.
«كوشىپ كەلگەننەن كەيىن اتا-اناسى قازىر تۇرىپ جاتقان جەرلەرىندە تۇرۋعا رۇقسات الدى. سونان سوڭ ولار جەرگىلىكتى مەملەكەتتىك ورگانداردىڭ جانە مەكتەپتىڭ باقىلاۋىندا بولدى جانە ءالى دە باقىلاۋ نازارىندا»، - دەدى پاۆلودار وبلىسىنىڭ بالالار ومبۋدسمەنى ساۋلە شاكەنەۆا Tengrinews.kz تىلشىسىنە.
ساۋلە شاكەنەۆا كامەلەتكە تولماعان بالا مەن ونىڭ سابيىنە كومەك پەن قولداۋ كورسەتۋدىڭ بارلىق مۇمكىندىكتەرىن قاراستىرۋ ءۇشىن وتباسى تۇراتىن اۋدانعا بارعان.
«ءجاسوسپىرىم قىز جۇكتىلىگىن اناسىنان كەڭ كيىم كيىپ ءجۇرىپ جاسىرىپ قالعان، قىزدىڭ ءوزى وعان ايتۋدان قورىققان. كۇدىكتى دە كامەلەتكە تولماعان، قىزدىڭ 17 جاستاعى تۋىسى بولىپ شىقتى. تەرگەۋ جالعاسۋدا»، - دەپ قوستى پاۆلودار وبلىسىنىڭ بالالار ومبۋدسمەنى ساۋلە شاكەنەۆا.
وبلىستىق پەريناتالدىق ورتالىق دارىگەرلەرىنىڭ ايتۋىنشا، كامەلەتكە تولماعان قىز جۇكتىلىك كەزىندە ۇنەمى باقىلاۋدا بولعان. مەكتەپ وقۋشىسىنىڭ كەلبەتىندەگى وزگەرىستەردى بايقاعان مۇعالىمدەر دارىگەرلەرگە حابارلاسقان. جۇكتىلىگى راستالعاننان كەيىن قىز جۇكتى ايەلدەر پاتولوگياسى بولىمىنە جاتقىزىلدى.
«قىزدىڭ دەنساۋلىعىنا قاۋىپ ءتونىپ تۇرعان جوق ەكەنىنە، ۇرىقتىڭ دامىپ وسۋىندە ءبارى جاقسى ەكەنىنە كوز جەتكىزىپ، ون كۇن بويى باقىلاۋدپ ۇستاپ، اناسىنىڭ جەتەكتەۋىمەن العاشقى مەديتسينالىق باقىلاۋعا شىعاردىق. ول بىزگە 34-ءشى اپتادا ۋدز سكرينينگىنە كەلدى، قارادىق، ۇرىق جۇكتىلىك مەرزىمىنە سايكەس دامىپ جاتتى، ەشقانداي اۋىتقۋلار جوق، ءبارى دۇرىس، سودان كەيىن كامەلەتكە تولماعان قىزدىڭ دەنساۋلىعىن قاداعالاۋدى ءارى قاراي جالعاستىردىق»، - دەدى پاۆلودار وبلىستىق ورتالىعى ديرەكتورىنىڭ مىندەتىن اتقارۋشى ينەسسا ۆىسوتسكايا.
دارىگەردىڭ پىكىرى پاۆلودار وبلىسىنىڭ بالالار ومبۋدسمەنىنىڭ الەۋمەتتىك جەلىسىندەگى رەسمي پاراقشاسىندا جاريالاندى. رەسمي مالىمەت بويىنشا، 19 شىلدەدە جەدەل جاردەم بريگاداسى تولعاعى باستالعان كامەلەتكە تولماعان بالانى پەريناتالدىق ورتالىققا جەتكىزگەن.
"قىز بالاعا جەدەل تۇردە وتا جاسالدى. سالماعى 3360 كەلى قىز بالا دۇنيەگە كەلدى. قازىر اناسى مەن ءسابيى ۋاقىتشا جاساندى تاماقتاندىرۋدا جانە ءجاسوسپىرىم-انا مەن بالاسى دا ءوزىن جاقسى سەزىنەدى. قىزمەتكەرلەر وعان بالا سياقتى قارايدى جانە بارلىق جاعىنان كومەكتەسۋگە تىرىسۋدا»، - دەپ ءتۇسىندىردى ۆىسوتسكايا.
ەستەرىڭىزگە سالا كەتەيىك، كەشە، 23 شىلدە كۇنى 12 جاستاعى وقۋشى قىز زورلىق قۇربانى بولىپ، انا اتانعانىن جازعان ەدىك.
بۇرىن حابارلانعانداي، وقۋشى قىزدىڭ جۇكتى ەكەنى جۇرتقا جايىلعان سوڭ، اۋداندىق ءبىلىم ءبولىمىنىڭ باسشىسىنا قاتاڭ سوگىس جاريالانىپ، مەكتەپ ديرەكتورى ءوز ەركىمەن قىزمەتىنەن كەتكەن بولاتىن.
«مەكتەپ ديرەكتورى زەينەتكەر بولعاندىقتان، ونىمەن ەڭبەك شارتى ءبىر جىلعا ۇزارتىلدى، ول ءوز ەركىمەن ەڭبەك شارتىنىڭ مەرزىمى اياقتالعاننان كەيىن جۇمىستان بوساتىلدى. »، - دەپ ءتۇسىندىردى پاۆلودار وبلىسىنىڭ ءبىلىم باسقارماسى.
