Pavlodar oblysynda zorlyq-zombylyq qurbany bolǵan 12 jastaǵy qyzdyń bosanýy qalaı ótkeni belgili boldy, - dep habarlaıdy “Adyrna” ulttyq portaly.
Belgili bolǵandaı, 12 jastaǵy mektep oqýshysy kesar tiligi arqyly bosanyp, qazir sábıimen birge aýrýhanada jatyr.
Pavlodar oblysynyń balalar ombýdsmeni túsindirgendeı, kámeletke tolmaǵan qyz tárbıelenip jatqan kóp balaly otbasy Qazaqstanǵa tórt jyl buryn kóship kelgen eken.
«Kóship kelgennen keıin ata-anasy qazir turyp jatqan jerlerinde turýǵa ruqsat aldy. Sonan soń olar jergilikti memlekettik organdardyń jáne mekteptiń baqylaýynda boldy jáne áli de baqylaý nazarynda», - dedi Pavlodar oblysynyń balalar ombýdsmeni Sáýle Shákeneva Tengrinews.kz tilshisine.
Sáýle Shákeneva kámeletke tolmaǵan bala men onyń sábıine kómek pen qoldaý kórsetýdiń barlyq múmkindikterin qarastyrý úshin otbasy turatyn aýdanǵa barǵan.
«Jasóspirim qyz júktiligin anasynan keń kıim kıip júrip jasyryp qalǵan, qyzdyń ózi oǵan aıtýdan qoryqqan. Kúdikti de kámeletke tolmaǵan, qyzdyń 17 jastaǵy týysy bolyp shyqty. Tergeý jalǵasýda», - dep qosty Pavlodar oblysynyń balalar ombýdsmeni Sáýle Shákeneva.
Oblystyq perınataldyq ortalyq dárigerleriniń aıtýynsha, kámeletke tolmaǵan qyz júktilik kezinde únemi baqylaýda bolǵan. Mektep oqýshysynyń kelbetindegi ózgeristerdi baıqaǵan muǵalimder dárigerlerge habarlasqan. Júktiligi rastalǵannan keıin qyz júkti áıelder patologııasy bólimine jatqyzyldy.
«Qyzdyń densaýlyǵyna qaýip tónip turǵan joq ekenine, uryqtyń damyp ósýinde bári jaqsy ekenine kóz jetkizip, on kún boıy baqylaýdp ustap, anasynyń jetekteýimen alǵashqy medıınalyq baqylaýǵa shyǵardyq. Ol bizge 34-shi aptada ÝDZ skrınıngine keldi, qaradyq, uryq júktilik merzimine sáıkes damyp jatty, eshqandaı aýytqýlar joq, bári durys, sodan keıin kámeletke tolmaǵan qyzdyń densaýlyǵyn qadaǵalaýdy ári qaraı jalǵastyrdyq», - dedi Pavlodar oblystyq ortalyǵy dırektorynyń mindetin atqarýshy Inessa Vysokaıa.
Dárigerdiń pikiri Pavlodar oblysynyń balalar ombýdsmeniniń áleýmettik jelisindegi resmı paraqshasynda jarııalandy. Resmı málimet boıynsha, 19 shildede jedel járdem brıgadasy tolǵaǵy bastalǵan kámeletke tolmaǵan balany perınataldyq ortalyqqa jetkizgen.
"Qyz balaǵa jedel túrde ota jasaldy. Salmaǵy 3360 keli qyz bala dúnıege keldi. Qazir anasy men sábıi ýaqytsha jasandy tamaqtandyrýda jáne jasóspirim-ana men balasy da ózin jaqsy sezinedi. Qyzmetkerler oǵan bala sııaqty qaraıdy jáne barlyq jaǵynan kómektesýge tyrysýda», - dep túsindirdi Vysokaıa.
Esterińizge sala keteıik, keshe, 23 shilde kúni 12 jastaǵy oqýshy qyz zorlyq qurbany bolyp, ana atanǵanyn jazǵan edik.
Buryn habarlanǵandaı, oqýshy qyzdyń júkti ekeni jurtqa jaıylǵan soń, aýdandyq bilim bóliminiń basshysyna qatań sógis jarııalanyp, mektep dırektory óz erkimen qyzmetinen ketken bolatyn.
«Mektep dırektory zeınetker bolǵandyqtan, onymen eńbek sharty bir jylǵa uzartyldy, ol óz erkimen eńbek shartynyń merzimi aıaqtalǵannan keıin jumystan bosatyldy. », - dep túsindirdi Pavlodar oblysynyń bilim basqarmasy.