مەملەكەت باسشىسى قاسىم-جومارت توقاەۆ عىلىم جانە جوعارى ءبىلىم ءمينيسترى ساياسات نۇربەكتى قابىلدادى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
ساياسات نۇربەك جوعارى ءبىلىم جانە عىلىم جۇيەسىن دامىتۋعا باعىتتالعان بىرقاتار باستاما مەن جوبالاردى تانىستىردى.
ءمينيستردىڭ ايتۋىنشا، ەلىمىزدە وسى ۋاقىتقا دەيىن شەتەلدىك جوعارى وقۋ ورىندارىنىڭ 25 فيليالى اشىلعان.
نۇربەك ءوز بايانداماسىندا شەتەلدىك سەرىكتەستەرمەن ايماقتارداعى مەملەكەتتىك ۋنيۆەرسيتەتتەردى حالىقارالىق ءبىلىم بەرۋ ستاندارتتارى بار زەرتتەۋ ۋنيۆەرسيتەتتەرىنە اينالدىرۋ تۋرالى كەلىسىمدەرگە قول جەتكىزىلگەنىن ايتتى.
ول بيىل ستۋدەنتتەرگە قارجىلاي قولداۋ كورسەتۋدىڭ جاڭا تەتىكتەرى ەنگىزىلە باستاعانىن جەتكىزدى.
ولاردىڭ قاتارىندا "كەلەشەك" بىرىڭعاي ەرىكتى جيناقتاۋ جۇيەسى، "ۇلتتىق قور – بالالارعا" باعدارلاماسى، جەڭىلدەتىلگەن ءبىلىم بەرۋ نەسيەسى مەن ديففەرەنتسيالانعان گرانتتار بار.
اتالعان شارالار حالىقتىڭ بارلىق ساناتىنا جوعارى ءبىلىمنىڭ قولجەتىمدى بولۋىن قامتاماسىز ەتۋگە باعىتتالعان.
مينيستر جاساندى ينتەللەكتىنى دامىتۋ جونىندەگى پرەزيدەنت تاپسىرمالارىنىڭ ورىندالۋى تۋرالى ەسەپ بەردى.
ايتۋىنشا، قازىر 8 جوعارى وقۋ ورنىندا 15 ءبىلىم بەرۋ باعدارلاماسى بويىنشا 2000-نان استام ستۋدەنت جاساندى ينتەللەكت سالاسىن وقىپ جاتىر. تسيفرلىق ەكونوميكاعا بەيىمدەلگەن كادرلاردىڭ الەۋەتىن دامىتۋ ءۇشىن Google, Nvidia, Coursera, 01 Edu System جانە Huawei سياقتى ترانسۇلتتىق كومپانيالارمەن ىنتىماقتاستىق ورناتىلعان.
مينيستر جاساندى ينتەللەكت سالاسىندا ماماندار دايارلاۋ ءۇشىن "بولاشاق" باعدارلاماسى ارقىلى جىل سايىن 100 ستيپەنديا ءبولۋ جوسپارلانىپ وتىرعانىن ايتتى.
كەزدەسۋ سوڭىندا مەملەكەت باسشىسى جاتاقحانالار سالۋ، جوعارى ءبىلىم مەن عىلىم ينفراقۇرىلىمىن ودان ءارى دامىتۋ جونىندە بىرقاتار تاپسىرما بەردى.
