"سولتۇستىك قازاقستان وبلىسى اكىمدىگىنىڭ دەنساۋلىق ساقتاۋ باسقارماسىنا" قاراستى شال اقىن اۋداندىق اۋرۋحاناسى 3 500 130 تەڭگەگە 170 تەكشە مەتر قايىڭ اعاشىن ساتىپ الۋعا تەندەر جاريالادى، دەپ حابارلايدى “ادىرنا” ۇلتتىق پورتالى satypalu.gov.kz سايتىنا سىلتەمە جاساپ.
مەملەكەتتىك ساتىپ الۋعا وتىنىمدەردى قابىلداۋ 17 شىلدە كۇنى باستالعان. جەڭىمپاز كومپانيا 24 شىلدە كۇنى انىقتالادى. تەحنيكالىق سيپاتتاماعا قاراپ، اۋداندىق اۋرۋحاناعا قايىڭ اعاشتارىنىڭ نە ءۇشىن قاجەت ەكەنىن تۇسىنە المادىق. تۇسىنگەنىمىز، 170 تەكشە مەتر قايىڭ اعاشى شال اقىن اۋدانىنا قارايتىن اۋىلدىق وكۋرگتەردىڭ ەمحانالارىنا ءبولىنىپ بەرىلەدى ەكەن.
تەحنيكالىق سيپاتتامانىڭ قازاقشا نۇسقاسىن ءتۇسىنۋ مۇمكىن ەمەس. قاراڭىز: "اعاش قايىڭ، چۋركوۆاننىە، ۇزىندىعى 30-40 سم، جەتكىزۋ. اعاشتا سىرتقى جانە ىشكى شىرۋگە جول بەرىلمەيدى. وتىن گوست كەلۋى كەرەك 3243-88 قابىلداۋ كەزىندەگى ولشەۋ كوەففيتسيەنتى 0,6. تۇيىندەردىڭ ۇزىندىعى 3 سم-دەن اسپاۋى كەرەك. وتىننىڭ ىلعالدىلىعى 25% -دان اسپايدى. بارلىق شىعىندار تاۋار باعاسىنا ەنگىزىلگەن. جەتكىزۋشى جەتكىزۋدىڭ باستالۋ جانە اياقتالۋ مەرزىمىمەن وتىن اكەلۋ كەستەسىن ۇسىنۋعا مىندەتتى. كەستە بويىنشا مەرزىم اياقتالعانعا دەيىن وتىن جەتكىزۋ وتىن جەتكىزۋ. تاۋارلاردى ولشەۋ جانە تيەۋ جانە جونەلتۋ تاپسىرىس بەرۋشىنىڭ قاتىسۋىمەن جۇزەگە اسىرىلادى. تاۋاردىڭ باعاسىنا جەتكىزۋ. تاۋاردى جەتكىزەر الدىندا ءونىم بەرۋشى تاپسىرىس بەرۋشىگە كەمىندە 24 ساعات حابارلاۋعا مىندەتتى. تاۋاردى جەتكىزۋ تاپسىرىس بەرۋشى وكىلىنىڭ قاتىسۋىمەن جۇرگىزىلەدى".
ءبىزدى "شال اقىن اۋداندىق اۋرۋحاناسىندا تەحنيكالىق سيپاتتامانى تازا مەملەكەتتىك تىلدە تۇسىنىكتى ەتىپ جازاتىن ءبىر دە ءبىر مامان جوق پا؟" دەگەن ساۋال مازالايدى. ماسەلەن، العاشقى سويلەمدى "قايىڭ اعاشى شولكەلەپ كەسىلگەن (ۇزىندىعى 30-40 سم), قابىعى دا، ءدىنى دە شىرىمەگەن بولۋى، وتىن 3243-88 گوست ستاندارتقا ساي كەلۋى كەرەك" دەپ تۇزەتسەك، وقىلۋعا دا، تۇسىنۋگە دە وڭاي بولار ەدى.
اۋداندىق اۋرۋحانانىڭ مەملەكەتتىك تىلگە بۇلاي نەمقۇرايلى قاراۋىنىڭ سەبەبى نەدە؟ بۇل سۇراقتى ءتيىستى مەكەمەگە جولدادىق. جاۋابىن الداعى ۋاقىتتا جاريالايتىن بولامىز!
اباي اسىل
“ادىرنا” ۇلتتىق پورتالى
