"Soltústik Qazaqstan oblysy ákimdiginiń densaýlyq saqtaý basqarmasyna" qarasty Shal aqyn aýdandyq aýrýhanasy 3 500 130 teńgege 170 tekshe metr qaıyń aǵashyn satyp alýǵa tender jarııalady, dep habarlaıdy “Adyrna” ulttyq portaly satypalu.gov.kz saıtyna silteme jasap.
Memlekettik satyp alýǵa ótinimderdi qabyldaý 17 shilde kúni bastalǵan. Jeńimpaz kompanııa 24 shilde kúni anyqtalady. Tehnıkalyq sıpattamaǵa qarap, aýdandyq aýrýhanaǵa qaıyń aǵashtarynyń ne úshin qajet ekenin túsine almadyq. Túsingenimiz, 170 tekshe metr qaıyń aǵashy Shal aqyn aýdanyna qaraıtyn aýyldyq okýrgterdiń emhanalaryna bólinip beriledi eken.
Tehnıkalyq sıpattamanyń qazaqsha nusqasyn túsiný múmkin emes. Qarańyz: "Aǵash qaıyń, chýrkovannye, Uzyndyǵy 30-40 sm, jetkizý. aǵashta syrtqy jáne ishki shirýge jol berilmeıdi. Otyn GOST kelýi kerek 3243-88 qabyldaý kezindegi ólsheý koeffııenti 0,6. Túıinderdiń uzyndyǵy 3 sm-den aspaýy kerek. otynnyń ylǵaldylyǵy 25% -dan aspaıdy. Barlyq shyǵyndar taýar baǵasyna engizilgen. Jetkizýshi jetkizýdiń bastalý jáne aıaqtalý merzimimen otyn ákelý kestesin usynýǵa mindetti. Keste boıynsha merzim aıaqtalǵanǵa deıin otyn jetkizý otyn jetkizý. Taýarlardy Ólsheý jáne tıeý jáne jóneltý Tapsyrys berýshiniń qatysýymen júzege asyrylady. Taýardyń baǵasyna jetkizý. Taýardy jetkizer aldynda ónim berýshi Tapsyrys berýshige keminde 24 saǵat habarlaýǵa mindetti. Taýardy jetkizý tapsyrys berýshi ókiliniń qatysýymen júrgiziledi".
Bizdi "Shal aqyn aýdandyq aýrýhanasynda tehnıkalyq sıpattamany taza memlekettik tilde túsinikti etip jazatyn bir de bir maman joq pa?" degen saýal mazalaıdy. Máselen, alǵashqy sóılemdi "Qaıyń aǵashy shólkelep kesilgen (uzyndyǵy 30-40 sm), qabyǵy da, dini de shirimegen bolýy, otyn 3243-88 GOST standartqa saı kelýi kerek" dep túzetsek, oqylýǵa da, túsinýge de ońaı bolar edi.
Aýdandyq aýrýhananyń memlekettik tilge bulaı nemquraıly qaraýynyń sebebi nede? Bul suraqty tıisti mekemege joldadyq. Jaýabyn aldaǵy ýaqytta jarııalaıtyn bolamyz!
Abaı Asyl
“Adyrna” ulttyq portaly
