سۇيىتىلعان مۇناي گازىن شەتەلگە زاڭسىز شىعارۋدىڭ 14 فاكتىسىنىڭ جولى كەسىلدى. بۇل تۋرالى بۇگىن، 16 شىلدەدە ۇكىمەت باسشىسى ولجاس بەكتەنوۆ ايتتى، دەپ حابارلايدى «ادىرنا» ءتىلشىسى.
پرەمەر-مينيستر ەلىمىزدىڭ سۇيىتىلعان مۇناي گازىمەن قامتاماسىز ەتۋ ماسەلەسىنە نازار اۋدارىپ، «كولەڭكەلى» ەكسپورتتىڭ جولىن كەسۋ جونىندەگى جۇمىستى كۇشەيتۋدى تاپسىردى.
ەلىمىزدە سۇيىتىلعان گازدى اۆتوموبيل وتىنى رەتىندە پايدالانۋ كولەمى ارتىپ كەلەدى. قازاقستاندا ونىڭ بولشەك ساۋداداعى باعاسى رەسەي، وزبەكستان، قىرعىزستان جانە الىس شەت ەلدەرمەن سالىستىرعاندا شامامەن 2 ەسە تومەن.
«باعانىڭ تومەن بولۋى ءىرى كولەمدە سۇيىتىلعان گازدىڭ شەكتەس ەلدەرگە زاڭسىز شىعارىلۋىنا اكەپ سوقتى. مەن بۇعان دەيىن ءتيىستى مەملەكەتتىك ورگاندارعا سۇيىتىلعان گازدىڭ «كولەڭكەلى» ەكسپورتىن، ونىڭ ىشىندە قىلمىستىق جاۋاپكەرشىلىكتى بەلگىلەۋ ارقىلى جولىن كەسۋ جونىندەگى جۇمىستى كۇشەيتۋدى تاپسىردىم. ۇلتتىق قاۋىپسىزدىك كوميتەتىنىڭ دەرەكتەرىنە سايكەس، سۇيىتىلعان مۇناي گازىن شەتەلدەرگە زاڭسىز شىعارۋدىڭ 14 فاكتىسىنىڭ جولى كەسىلدى. بۇل جۇمىستى جالعاستىرۋ قاجەت. اسىرەسە، تۇتىنۋ كولەمى نەگىزسىز قۇبىلىپ وتىرعان اتىراۋ جانە اباي وبلىستارى مەن بىرقاتار شەكارالاس وڭىرلەردەگى جاعدايدى ەرەكشە باقىلاۋعا الۋدى تاپسىرامىن»، — دەپ اتاپ ءوتتى ولجاس بەكتەنوۆ.
