بالالاردىڭ بەتىنە بۇرىش باللونىن شاشقان ءجاسوسپىرىم ەكى ايعا قاماۋعا الىندى، دەپ حابارلايدى "ادىرنا" ۇلتتىق پورتالى.
جاسوسپىرىمگە ەكى باپ بويىنشا ايىپ تاعىلعانى ءمالىم بولدى.
10 شىلدە كۇنى باللون ارقىلى بالالاردىڭ دەنساۋلىعىنا زيان كەلتىرگەن 16 جاستاعى ءجاسوسپىرىم مامانداندىرىلعان تەرگەۋ سوتىنا اكەلىندى. قاماۋعا الىنعان سوتتالۋشىعا قاتىستى بۇلتارتپاۋ شاراسىن سانكتسيالاۋ تۋرالى ءوتىنىشحات تۇسكەن.
مامانداندىرىلعان تەرگەۋ سوتىنىڭ ءباسپاسوز قىزمەتى ءجاسوسپىرىم ماس كۇيىندە باسقا كامەلەتكە تولماعان بالانىڭ كروسسوۆكاسىن ۇرلاپ، وعان 16 000 تەڭگە كولەمىندە ماتەريالدىق شىعىن كەلتىرگەنىن حابارلادى. وسىدان كەيىن ءجاسوسپىرىم بۇزاقىلىق نيەتپەن بالالاردىڭ بەتىنە بۇرىش بالونىن شاشقان. مۇنىڭ ءبارىن ءوزى ۆيدەوعا ءتۇسىرىپ وتىرعان كورىنەدى. سوتتا جەتكىنشەكتىڭ ەلدەن تىس جەردە جاسىرىنباق بولعانى، بىراق باتىس قازاقستان وبلىسىنىڭ اۋماعىندا ۇستالعانى ايتىلدى.
"16 جاستاعى ءجاسوسپىرىم باسقا ەلدىڭ ازاماتى بولىپ شىقتى، سوت ول بوستاندىقتا جۇرگەندە قىلمىستىق جاۋاپكەرشىلىكتەن جالتارۋ ءۇشىن قىلمىستىق قۋدالاۋ ورگانى مەن سوتتان جاسىرىنۋى مۇمكىن دەپ شەشتى. وعان قاتىستى ەكى اي مەرزىمگە قاماۋعا الۋ تۇرىندەگى بۇلتارتپاۋ شاراسى قولدانىلدى", - دەلىنگەن سوت ماتەريالىندا.
