قىزىلوردالىق اقىن نۇرمۇحاممەد ابىلقاسىموۆتىڭ شاڭىراعىندا ۇلكەن توي! جۇبايى ەگىز بالانى دۇنيەگە اكەلدى. بۇل تۋرالى بەلگىلى اقىن مارالتاي رايىمبەكۇلى facebook الەۋمەتتىك جەلىسىندەگى پاراقشاسىنا جازدى، دەپ حابارلايدى «مادەنيەت پورتالى». مارالتاي رايىمبەكۇلى: «بۇگىن تاڭ اتپاي ءسۇيىنشى xابارمەن وياندىم. قىزىلوردالىق اقىن ءىنىم نۇرمۇxاممەدتىڭ ۇيىندەگى كەلىن ومىرگە ءبىر ۇل، ءبىر قىز اكەلىپتى! قۇرمەتتى نۇرمۇxاممەد باۋىرىم ۇل مەن قىزىڭ امان-ەسەن ءوسىپ وزىڭە قولقانات بولسىن! سەن ناعىز ەرلىكتىڭ ۇلگىسىسىڭ!!!»، - دەدى.
مۇمكىندىگىنىڭ شەكتەۋلىگىنە قاراماستان نۇرمۇحاممەد اقىن بىرنەشە جىر جيناقتىڭ اۆتورى. ول ومىردەگى بارلىق قيىندىقتى توزىممەن، سابىرمەن جەڭگەن اقىن. ولەڭدەرىن اۋزىنا تاياقشا تىستەپ ۇيالى تەلەفونعا عانا حابارلاما تۇرىندە جازىپ، نە بارى 4-5 جىلدىڭ ىشىندە اقىندىق الەمدە توسەلىپ، ەكى جىر جيناق شىعارعان. وسىدان بىرنەشە جىل بۇرىن قىزىلوردا وبلىسىنىڭ اكىمى كەزىندە قىرىمبەك كوشەرباەۆ اقىن نۇرمۇحاممەد ابىلقاسىموۆتى قابىلداپ، تالانتتى جانعا ەكى بولمەلى پاتەردىڭ كىلتىن تابىستاعان بولاتىن. ول: «تەپسە تەمىر ۇزەتىن تالاي جاندار بوس ءجۇر. ال سەنىڭ مىنا ەڭبەگىن ناعىز ەرلىكپەن پارا-پار. ون ەكى مۇشەڭنىڭ تۇگەل ەمەستىگىنە قاراماستان ءومىر سۇرۋگە قۇلشىنىسىڭ جوعارى. جىر جيناقتارىڭدى ارنايى وقىپ شىقتىم»، – دەگەن بولاتىن.
بەلگىلى اقىن قالقامان سارين دە facebook الەۋمەتتىك جەلىسىندەگى پاراقشاسىنا: «ونىڭ ومىرگە دەگەن قۇشتارلىعى كىمدى بولسا دا قايران قالدىرماي قويماس. اللا وعان ازاپپەن قوسا اقىندىقتى بەردى. اۋزىنا جىڭعىل تاياقشاسىن تىستەپ جىر جازاتىن اقىن ەستەرىڭىزدە مە؟
ول – نۇرمۇحاممەد! مەنىڭ دوسىم، قۇرداسىم، جاقىنىم. ءبىز ۇزاق سىرلاساتىنبىز. ارماندارىم كوپ دەيتىن. سول اسىل ارماندارىنىڭ ءبىرى – وتباسىن قۇرىپ، بالا ءسۇيۋ بولاتىن. مەن دە اقىننىڭ سول ارمانى ورىندالسا ەكەن دەپ تىلەيتىن ەدىم. مىنە، قۇداي تاعالا سول كۇنگە جەتكىزدى. تىلەگىمىز قابىل بولدى!
نۇرمۇحاممەد ءبىر ۇل، ءبىر قىزدىڭ اكەسى اتاندى. قاجەتىمىزدى سۇراتپاي بەرگەن، سۇراعانىمىزدى ەسەلەپ بەرگەن، ەگىز بەرگەن اللاعا سانسىز ماداق، سانسىز شۇكىر!
– ۇلىمنىڭ اتىن قالقامان، قىزىمنىڭ اتىن قاراقات قويام دەپ، تۇندە قوڭىراۋ شالدى. ساعان دەگەن قۇرمەتىم، رۇقساتىڭدى بەر! - دەيدى...))
قۋانىشىندا شەك جوق!
ەڭ باستىسى، امان بولسىن دەپ تىلەدىم!»، - دەپ اعىنان جارىلدى.
"ادىرنا" ۇلتتىق پورتالى
