الماتىدا تۇراتىن مۋزىكانت جانە بلوگەر الەكساندر تسوي جەلىدەگى پاراقشاسىندا "تۇلپار-تالگو" جولاۋشىسىن زورلاعان جولسەرىكتەرگە قاتىستى شىعارىلعان ۇكىمگە نارازىلىعىن ءبىلدىردى. ول قىلمىسكەرلەرگە مەيلىنشە كوپ ۋاقىت بەرۋدى تالاپ ەتكەن. الايدا، زورلىقشىلاردى ءۇش جىلعا جەتەر-جەتپەس ۋاقىتقا عانا سوتتاپ، ءبىز زارداپ شەگۋشى ايەلگە ادىلەتسىزدىك جاسادىق دەيدى الەكساندر تسوي.
"توپتىق زورلاۋ - قازىرگى قوعامنىڭ ەڭ جيىركەنىشتى قىلمىستارىنىڭ ءبىرى. زورلايتىن ادامداردى، اسىرەسە توپپەن زورلايتىنداردى ەركىندىكتە دە، قاماۋدا دا ەشكىم سىيلامايدى. تەك قازاقستاننىڭ سوت جۇيەسىندە عانا ولارعا سىيلاستىق تانىتادى. ويتكەنى زورلىقشىلاردىڭ ءبىرىن 2,5 جىلعا، ەندى ءبىرىن 2,3 جىلعا عانا قاماۋعا الدى. ەگەر زارداپ شەككەن ايەل زورلاعان ادامداردىڭ ءبىر جەرىن جاراقاتتاپ الاتىن بولسا، ونى كوپ جىلعا سوتتار ەدى", - دەيدى الەكساندر تسوي.
زورلاۋ ءىسى توپتىققا جاتقىزىلماعان. ويتكەنى زارداپ شەگۋشىنى قۇرمانيازوۆ پەن ۇمبەتاليەۆ ءبىر ۋاقىتتا ەمەس، كەزەكپەن زورلاعان. سونىمەن قاتار، ەلىمىزدە زورلاۋ ءىسى اۋىر قىلمىس بولىپ ەسەپتەلمەگەندىكتەن، وسىنداي شەشىم قابىلداندى. بۇل تۋرالى بلوگەر اشىنا جازىپ، ادامنىڭ قۇنى مالدان دا تومەن بولىپ كەتكەن دەپ ءتۇسىندىردى.
"ادام زورلاۋدى اۋىر قىلمىسقا جاتقىزباۋ، قازاقستاننىڭ حالىقارالىق ۇيىمنىڭ الدىندا العان مىندەتتەرىن بۇزۋ بولىپ ەسەپتەلەدى. حالىقارالىق ستاندارتتار نەگىزىندە زورلىق ءىسى بويىنشا تۇرمەگە قامالۋى شارت. ءبىزدىڭ ەلىمىزدە قوي ۇرلاۋ اۋىر قىلمىس بولىپ ەسەپتەلەدى. ەگەر ءسىز بىرەۋدىڭ ەسىگىنىڭ الدىنان سيىرىن ۇرلاپ كەتسەڭىز، مال ءۇشىن بۇدان 3 ەسە ارتىق بەرەدى", - دەپ جازدى بلوگەر.
ەستەرىڭىزگە سالا كەتەيىك، وسى ۋاقىتقا دەيىن جولاۋشىنى زورلاعان "تالگو" جولسەرىكتەرىنە بايلانىستى سوت ۇكىمى شىققانى تۋرالى جازعان بولاتىنبىز
"ادىرنا" ۇلتتىق پورتالى
