قازاقستاندىق پروديۋسەر، تەلەجۇرگىزۋشى جانە اكتەر نۇرلان قويانباەۆ تۇركىستان وبلىسى اكىمىنىڭ شتاتتان تىس كەڭەسشىسى بولىپ تاعايىندالدى, دەپ حابارلايدى «ادىرنا» ءتىلشىسى.
«تۇركىستان وبلىسى اكىمى دارحان ساتىبالدىنىڭ وكىمىمەن نۇرلان قويانباەۆ تۇركىستان وبلىسى اكىمىنىڭ كرەاتيۆتى يندۋستريانى دامىتۋ باعىتى بويىنشا شتاتتان تىس كەڭەسشىسى بولىپ تاعايىندالدى»،—دەلىنگەن حابارلامادا.
نۇرلان قويانباەۆ 1979 جىلدىڭ 19 شىلدەسىندە قىزىلوردا وبلىسىندا دۇنيەگە كەلگەن. 1996-2000 جىلدار ارالىعىندا ءال-فارابي اتىنداعى قازۇۋ-دىڭ تاريح فاكۋلتەتىندە ءبىلىم العان. 2009-2011 جىلدارى ەكونوميكا جانە قۇقىق اكادەمياسىندا قارجى جانە نەسيە فاكۋلتەتىندە وقىدى. 2012-2015 جىلدارى ءال-فارابي اتىنداعى قازۇۋ-دا حالىقارالىق قاتىناستار ماماندىعى بويىنشا ماگيستراتۋرانى ءبىتىردى.
بۇعان دەيىن ول پرەزيدەنت تەلەراديوكەشەنىنىڭ كرەاتيۆتى ديرەكتورى، «قازاقستان» ۇلتتىق تەلەارناسىنىڭ باس پروديۋسەرى قىزمەتىن اتقاردى.
