ۇقك ەكس-توراعاسى كارىم ماسىموۆكە راقىمشىلىق بەرىلمەيدى. بۇل تۋرالى ءماجىلىس دەپۋتاتى ابزال قۇسپان ايتتى، دەپ حابارلايدى “ادىرنا” ۇلتتىق پورتالى.
«پرەزيدەنت جانىنداعى ازاماتتارعا كەشىرىم جاساۋ جونىندەگى كوميسسياسى كارىم ماسىموۆكە كەشىرىم بەرۋدەن باس تارتتى» دەدى دەپۋتات.
الايدا ساراپشىلاردىڭ توپشىلاۋىنشا، سوڭعى ءسوزدى پرەزيدەنت ايتاتىن سياقتى.
ەسكە سالايىق، ءماسىموۆ 2022 جىلعى قاڭتار وقيعاسى كەزىندە ۇستالدى. وعان قاتىستى قىلمىستىق ءىس اسا قۇپيا گريفىمەن بەلگىلەندى. 2023 جىلدىڭ 24 ساۋىرىندە استانا سوتى قر ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆتى قر قك 175-بابىنىڭ 1-بولىگى مەن 3-بولىگى بويىنشا، مەملەكەتكە وپاسىزدىق جاسادى، بيلىكتى كۇشپەن باسىپ الۋعا ارەكەتتەندى جانە بيلىكتى اسىرا پايدالاندى دەگەن ايىپپەن 18 جىلعا باس بوستاندىعىنان ايىردى. ونىڭ ۇكىمگە شاعىمدانۋ ارەكەتى ءساتسىز اياقتالدى – اپەللياتسيالىق سوت ۇكىمدى وزگەرىسسىز قالدىردى.
سونداي-اق، ونىڭ بۇرىنعى ورىنباسارلارى ءانۋار سادىقۇلوۆ - 16, داۋلەت ەرعوجين جانە مارات وسيپوۆ - 15 جانە ءۇش جىلعا سوتتالدى.
