سانكت-پەتەربۋرگتە كولىك جارىلىپ، رەسەي ارمياسىنىڭ پولكوۆنيگى قازا تاپتى، دەپ حابارلايدى «ادىرنا» ءتىلشىسى lenta.ru-عا سىلتەمە جاساپ.
وقيعا 12 قاراشا كۇنى تاڭەرتەڭ شۋشارى كەنتىندەگى سلاۆيانكا شاعىن اۋدانىندا بولعان. ساعات 07:00 شاماسىندا كولپينو تاسجولىندا رەسەي پولكوۆنيگى باسقارعان اۆتوكولىك جارىلعان.
78.ru تەلەارناسىنىڭ مالىمەتىنشە، قازا تاپقان اسكەري قىزمەتكەر اسكەري-اۋە كۇشتەرى مەن اۋە قورعانىسى 6-ارمياسىنىڭ باس شتۋرمانى قىزمەتىن اتقارعان. ونىڭ اتى-ءجونى ازىرگە جاريالانعان جوق.
الدىن الا مالىمەت بويىنشا، بەلگىسىز بىرەۋلەر كولىكتىڭ استىڭعى بولىگىنە جارىلعىش قۇرىلعى بەكىتكەن. اسكەري قىزمەتكەر اۋلادان شىعىپ بارا جاتقان كەزدە بومبا قاشىقتان ىسكە قوسىلعان.
جارىلىس تۇرعىن ۇيلەردىڭ جانىنداعى اۆتوتۇراقتا، «لەنتا» دۇكەنى مەن جانارماي قۇيۋ بەكەتىنە جاقىن جەردە بولعان. وقيعا ورنىنا ءورت سوندىرۋشىلەر جەتىپ، كولپينو تاسجولىنداعى كولىك قوزعالىسى ۋاقىتشا توقتاتىلعان.
باستاپقىدا پولكوۆنيكپەن بىرگە كولىكتە ونىڭ تۋىسى بولعانى حابارلانعان. الايدا كەيىن وفيتسەردىڭ كولىكتە جالعىز وتىرعانى انىقتالدى. مۇنى بەينەباقىلاۋ كامەرالارىنىڭ جازبالارى راستاعان. اسكەري قىزمەتكەردى ءولتىرۋ دەرەگى بويىنشا قىلمىستىق ءىس قوزعالعان.
«Mash نا مويكە» Telegram-ارناسىنىڭ حابارلاۋىنشا، قازىرگى جارىلىس بولعان جەر 2026 جىلعى 27 تامىزدا تاعى ءبىر كولىك جارىلعان اۋماقتان شامامەن 500 مەتر قاشىقتىقتا ورنالاسقان. سول كەزدە اۆتوكولىكتە رەسەي ارمياسىنىڭ پودپولكوۆنيگى مەن ونىڭ جۇبايى بولعان. اسكەري قىزمەتكەر وقيعا ورنىندا قازا تاۋىپ، ايەلى جانساقتاۋ بولىمىنە جەتكىزىلگەن.
باق مالىمەتىنشە، قازا تاپقان وفيتسەر دە اسكەري-اۋە كۇشتەرى مەن اۋە قورعانىسى اسكەرلەرىندە قىزمەت ەتكەن. ول وقيعا كەزىندە دە قولدان جاسالعان جارىلعىش قۇرىلعى كولىككە بەكىتىلىپ، قاشىقتان ىسكە قوسىلعان.
سلاۆيانكا شاعىن اۋدانى 2010 جىلدارى سالىنعان. رەسەي قورعانىس مينيسترلىگى مۇندا كەلىسىمشارت بويىنشا قىزمەت ەتەتىن اسكەري قىزمەتكەرلەر مەن زاپاسقا شىعارىلاتىن وفيتسەرلەر ءۇشىن پاتەرلەر ساتىپ العان. تۇرعىن ءۇي نەگىزىنەن كاپيتان، مايور، پودپولكوۆنيك جانە پولكوۆنيك سەكىلدى ورتا جانە جوعارى بۋىن كومانديرلەرىنە، سونداي-اق پراپورششيكتەر مەن سەرجانتتارعا بەرىلگەن.
