جات اعىمنىڭ جەتەگىندە كەتكەن قازاقستاندىق ايەلدەر سيريادا بالا-شاعاسىمەن ارپا، ءشوپ جەپ ارەڭ امان قالعان. تۋعان جەرلەرىنە جەتۋ ءۇشىن ءتورت تاۋلىك بويى جاياۋ ءجۇرىپ كەلىپتى. «جۋسان» وپەراتسياسىمەن ەلگە ورالعانداردىڭ ىشىندە قاراعاندىلىقتار دا بار.
«جولعا شىققانىمىزدا ماعان سيرياعا كەتىپ بارا جاتقانىمىزدى ايتتى. سول ساتتە شوك جاعدايىندا تۇردىم. «قالاي سيرياعا؟ ايەلدەر ول جاقتا نە ىستەيدى؟ ول جاقتا سوعىس بولىپ جاتىر ەمەس پە؟» دەدىم. ال ول كۇيەۋى ايتقاندى ايەلىنىڭ ورىنداۋى كەرەكتىگىن ايتتى. جىلادىق، شۋ شىعاردىق. مۇنىڭ بارلىعى جولدا بولدى»، - دەيدى قاراعاندىلىق ايەل.
سونداي-اق، ول سيريادا ءجۇرىپ وزدەرىنەن بۇرىن بالالاردىڭ قينالعانىن ايتادى. سەبەبى، اس جوق بولعاندىقتان، كوشەدەن تاپقاندارىن جەۋگە ءماجبۇر بولعان ەكەن.
«كەنجەمە 40 كۇن تولعان ەدى. ول شەتىنەپ كەتتى. كەيىن ءارى-بەرى كوشىپ جۇردىك. بىراق سوڭعى جارتى جىلدا دالادا تۇردىق. ول جاقتا تاماق بولمادى، جۋىندى ءىشىپ، ءشوپ جەدىك. اشتان ولمەۋ ءۇشىن ادام كەز كەلگەن نارسەنى جەي بەرەدى ەكەن. مۇنداي استى بالالاردىڭ اسقازانىنىڭ كوتەرمەگەنى راس. مۇنى ادامدار جەمەيدى عوي»، - دەيدى ول.
بۇدان وزگە ول سيريادا سوڭعى ۋاقىتتا كىمنىڭ كىم ەكەنىنە قاراماي ءبارىن بومبالاپ جاتقانىن ايتىپ نالىدى. ءتىپتى، كىشكەنە بۇلدىرشىندەرگە دەيىن اياماعان ەكەن.
"ادىرنا" ۇلتتىق پورتالى
