قازاقستاننىڭ ىشكى ىستەر مينيسترلىگى ۋكراينادا جۋرناليست ايدوس سادىقوۆقا قاستاندىق جاسادى دەگەن كۇدىكتىنىڭ ءوز قاتارىندا بارىن جوققا شىعاردى، دەپ حابارلايدى “ادىرنا” ۇلتتىق پورتالى.
«ازامات م.قاراتاەۆقا قاتىستى، ول 2019 جىلدىڭ قاڭتارىندا ىشكى ىستەر ورگاندارىنان بوساتىلعانىن جانە قازىرگى ۋاقىتتا پوليتسيا قىزمەتكەرى ەمەس ەكەنىن حابارلايمىز.
قازىر مەملەكەت باسشىسىنىڭ تاپسىرماسىنا سايكەس ءىستىڭ بارلىق ءمان-جايىن انىقتاۋ ءۇشىن ءتيىستى جەدەل شارالار قابىلداۋدامىز. وسى جۇمىستاردىڭ قورىتىندىسى بويىنشا قوسىمشا اقپارات بەرىلەدى»، - دەدى جۇما كۇنى ىشكى ىستەر مينيسترلىگى.
بۇعان دەيىن ءجۋرناليستىڭ ايەلى ناتاليا سادىقوۆا كيەۆتەگى قاستاندىققا پوليتسيا قىزمەتكەرىنىڭ قاتىسى بار دەگەن بولجام ايتتى.
“ۋكراينا پوليتسياسى ايدوس سادىقوۆتى ولتىرمەك بولعان قىلمىسكەرلەردى تاپتى”، دەپ جازدى ونىڭ ايەلى ناتاليا سادىقوۆا Facebook-تە.
ونىڭ ايتۋىنشا، بۇل ەكى قازاقستان ازاماتى: 1991 جىلى تۋعان مەيرام قاراتاەۆ پەن 1988 جىلى تۋعان التاي جاقانباەۆ.
«بۇل ارامزالار» 2 ماۋسىمدا كيەۆكە كەلىپ، جالدامالى پاتەرلەردە تۇرىپ، ايدوستىڭ سوڭىنان ەرىپ، قىلمىستى جوسپارلاعان»، — دەيدى سادىقوۆا.
«سونىمەن قاتار، مەيرام قاراتاەۆ قوستاناي وبلىسى ءىىد قىزمەتكەرى، ول قىزمەتكەرلەر اراسىندا وق اتۋ جارىسىندا ءبىرىنشى ورىن العان»، — دەپ جازدى ناتاليا.
ەستەرىڭىزگە سالا كەتەيىك، سادىقوۆ 18 ماۋسىمدا كيەۆتەگى ءۇيىنىڭ جانىندا كولىكتە وتىرعان كەزدە بەلگىسىز بىرەۋ ونى اتىپ، قاشىپ كەتكەن. «بازا» وپپوزيتسيالىق جوباسىنىڭ اۆتورىنىڭ قاسىندا ونىڭ ايەلى، جوبانىڭ تەڭ اۆتورى ناتاليا سادىقوۆا بولعان. ول جاراقات العان جوق.
19 ماۋسىمدا پرەزيدەنت قاسىم-جومارت توقاەۆ سادىقوۆقا جاسالعان قاستاندىققا قاتىستى پىكىر ءبىلدىرىپ، ديپلوماتيالىق دەپارتامەنت پەن قۇقىق قورعاۋ ورگاندارى ارقىلى وسى اۋىر وقيعاعا قاتىستى رەسمي ساۋال جولداۋدى تاپسىردى.
قازىر ايدوس سادىقوۆتىڭ جاعدايى وتە اۋىر.
