عىلىم جانە جوعارى وقۋ ءمينيسترى ساياسات نۇربەك ۋنيۆەرسيتەت رەكتورى ەكى مەرزىمنەن ارتىق باسشى بولا المايتىنىن ايتتى، دەپ حابارلايدى Adyrna.kz ۇلتتىق پورتالى.
ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا مينيسترگە «ناۋرىز ايىندا ءسىز رەكتورلاردى ەكى رەتتەن ارتىق تاعايىنداماۋعا بايلانىستى كوميسسيا وتىرىسى وتەدى دەپ ەدىڭىز. ءوزىڭىز ايتقان كوميسسيا وتىرىسى قانداي شەشىمگە كەلدى؟ ءبىر ادام تاپجىلماي 13 جىل رەكتور بولا بەرە مە، جوق الدە كوميسسيا وتىرىسى قاندايدا ءبىر جاڭالىق ەنگىزدى مە؟» دەپ سۇراق قويدى.
«كوميسسيا وتىرىسى بولىپ، ءتيىستى وزگەرىستەر ەنگىزىلدى. وسى جىلدىڭ ءساۋىر ايىنان باستاپ رەكتورلىققا ءوتىنىش بەرگەن تالاپكەرلەر 2 مەرزىمنەن كوپ وتىرا المايدى. سەبەبى ءتيىستى زاڭنامالىق وزگەرىستەردى ەنگىزدىك. ءبىر مەرزىم ءۇش جىلدان بولسا، رەكتور 6 جىلدان ارتىق باسشى بولا المايدى.
سونداي-اق رەكتور بولعىسى كەلەتىن تالاپكەرلەرگە تالاپتار كۇشەيتىلدى. ەندى رەكتورلىققا كەمىندە اكادەميالىق سالادا 10 جىل تاجىريبەسى بار، ونىڭ ىشىندە 5 جىل باسقارۋشى-اكادەميالىق لاۋازىمداردا عىلىمي دارەجەسى بار ادامدار ءوتىنىش بەرە الادى جانە اعىلشىن ءتىلىن ءبىلۋ تالابىن ەنگىزدىك. سونىمەن قاتار باق-تا، الەۋمەتتىك جەلىدە مورالدىق، رەپۋتاتسيالىق تۇرعىدان جاعىمسىز پىكىر قالىپتاسقان ادام رەكتور بولا المايدى. بۇل تالاپتاردى كوميسسيانىڭ شەشىمىمەن بەكىتتىك، ەندى رەكتورلىققا تالاپكەرلەرگە تالاپ كۇشەيتىلدى»، – دەدى ول.
سونداي-اق جۋرناليست «بۇل تالاپ رەكتورلىق قىزمەتتە 5 نەمەسە 10 جىلدان استام ۋاقىت وتىرعان ازاماتتارعا قاتىسى بار ما؟» دەپ سۇراق قويدى.
«قازاقستاندا نەگىزگى زاڭنامالىق پرينتسيپ بار. جاڭادان قابىلدانعان زاڭنىڭ بۇرىنعى قابىلدانعان شەشىمدەرگە كۇشى جوق. سول سەبەپتى زاڭنامالىق وزگەرىستەرگە دەيىن تاعايىندالعان رەكتورلاردىڭ كونتراكتىلەرى بىتكەندە عانا قازىرگى زاڭدىق كۇشىمەن جالعاستىرادى»، – دەدى ول
ەستەرىڭىزدە بولسا، بۇعان دەيىن اdyrna.kz ۇلتتىق پورتالىندا «مينيستر رەكتورلاردىڭ “اقش پرەزيدەنتى سەكىلدى” شەكتەلەتىنىن ايتتى» دەگەن تاقىرىپتا اقپارات شىقتى. اتالعان ماتەريالدا ەرلان سىدىقوۆتىڭ ەۋرازيا ۋنيۆەرسيتەتىن 13 جىلدان بەرى باسقارىپ كەلە جاتقانى ءسوز بولعان. دەمەك ساياسات نۇربەك ەنگىزگەن وزگەرىستىڭ ەرلان ءباتتاشۇلىنا قاتىسى جوق.
