تانىمال ايتىسكەر اقىن تۇرمىستىق زورلىق-زومبىلىققا قارسى زاڭ جوباسىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
ايتىسكەر اقىننىڭ سوزىنشە جاڭا زاڭ شىقتى ەكەن دەپ كۇيەۋلەرىنە جالا جاباتىن ايەلدەر كوبەيگەن.
"قازىر بىزگە بىرەۋدىڭ ءومىرى وتە قىزىق. 24 ساعاتتىڭ 18 ساعاتىندا «ايەلى بىلاي دەپتى»، «كۇيەۋى نە جاۋاپ بەردى ەكەن» بوتەن وتباسىنىڭ پاراقشاسىن اڭدۋمەن وتىرامىز. جۇبايلىق ءومىردىڭ ءتۇرلى ساتتەرى بولادى عوي. سونىڭ ءبارىن ينستاگرامعا سالا بەرۋگە قارسىمىن ءوز باسىم. قازىر الەۋمەتتىك جەلىدە وتباسىلىق ءومىردى تالقىلاۋ جەلدەي ەسىپ كەتتى. مەن زورلىق-زومبىلىق، ۇرىپ-سوعۋ دەگەنگە تۇبەگەيلى قارسىمىن. «قارسى ەمەسپىن» دەيتىن ايەل جوق شىعار؟! قيسىق قابىرعاڭنان جاراتىلعان جاندى ءوز الەمىڭە ساي ەتىپ تۇزەپ الام دەۋ – ەڭ اقىماق ەركەكتىڭ قاعيداسى. ونى ۇرىپ-سوعىپ تاربيەلەي المايسىڭ. ەگەر ايەلىڭ كوزىڭە جىن بوپ كورىنسە، باسقا جولىن تاپ. ودان دا بوساتا سال. ۇرىپ-سوعىپ، اكە-شەشەسىنەن بوقتاپ جونگە سالۋ – بوس اۋرەشىلىك. ايەلگە قولىن تيگىزىپ، اكە-شەشەسىنەن بوقتاعان كۇنى ەركەك ءوزىنىڭ «ەركەك» دەگەن قۇنىن ءتۇسىرىپ الادى. وسىنى ويلاڭدار، ازاماتتار" – دەپ جازدى اقىن.
اقىن سارا توقتامىسوۆا تۇرمىستىق زورلىق-زومبىلىققا قاتىستى ايەل ادامداردىڭ ءوز جولداسىن ۇستاتىپ جىبەرەتىنىن ايتادى.
"مۇنىڭ ەكىنشى جاعى بار. قازاقستاندا زاڭ شىقتى ەكەن دەپ پالەن جىل وتاسقان كۇيەۋلەرىن حالىق جاۋى قۇساتىپ ۇستاپ بەرىپ جاتقان ايەلدەر دە شىعىپ جاتىر. ءبىزدىڭ، ايەلدەردىڭ، ءتىلىمىز وتە ۇزىن. «قوي» دەگەندە قويا سالماي، كەي جىگىتتىڭ ءتىلىن شىعارامىز. سوندىقتان بولعان جايتتى جۇرتقا جايىپ، ءجونسىز-جوباسىز كۇيەۋىنە قارا كۇيەنى جاعىپ، ءوزى سۇتتەن اق، سۋدان تازا بولاتىن ايەلدەردى قۇداي كەشىرسىن. ەشقاشان تەك ءبىر جاق كىنالى بولمايدى، سونى ساراپقا سالىپ ويلانۋ كەرەك دەپ ويلايمىن. بىرەۋدىڭ ومىرىنە ارالاسىپ، پىكىر جازىپ ۋاقىتىڭدى بوس كەتىرمەي، وزىڭمە اينالىس، وزىڭە ارنا ۋاقىتتى", – دەدى ول.
