پاۆلودار وبلىسىنىڭ «قارتتار مەن مۇگەدەكتىگى بار ادامدارعا ارنالعان جالپى ۇلگىدەگى اقسۋ ارناۋلى الەۋمەتتىك قىزمەتتەر كورسەتۋ ورتالىعى» 19 ماۋسىم كۇنى «نان (بيداي، قارا بيداي)» دەگەن تاقىرىپپەن تەندەر جاريالادى. سول جاريالانىم ماتىنىندەگى قاتەلىكتەر مەملەكەتتىك ءتىلدى ماسقارالايدى، - دەپ حابارلايدى «ادىرنا» ۇلتتىق پورتالى https://satypalu.gov.kz/kz/ سايتىنا سىلتەمە جاساپ.
پاۆلودار وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا قاراستى اتالمىش مەكەمە مەملەكەت قارجىسىنا 2 100 000 تەڭگەگە نان ساتىپ الماق كورىنەدى. تەندەر جەڭىمپازى 26 ماۋسىم كۇنى انىقتالادى.
تەندەرىنىڭ تەحنيكالىق سيپاتتاماسىن وقىپ شىقساڭىز، مەملەكەتتىك مەكەمەنىڭ مەملەكەتتىك ءتىلدى قالاي قورلاعانىن كورەسىز. قاراڭىز:
«1-سۇرىپتى قارا بيداي ۇنىنان جاسالعان، ۇزاق ساقتالاتىن، بەتى ءىرى جارىقشاقسىز، قوپارۋسىز تەگىس، ءتۇسى سارىدان قوڭىرعا دەيىن. مياكيش پروپەچەننىي ەمەس، دىمقىل سەزىلەدى، ەلاستيچنىي. ءونىمنىڭ وسى تۇرىنە ءتان ءدام مەن ءيىس. ءبىر بولكە سالماعى 550 گر كەم ەمەس. تاۋار تاڭەرتەڭگى ۋاقىتتا تاپسىرىس بەرۋشىنىڭ ءوتىنىمى بويىنشا جاڭا جەتكىزىلەدى».
«بەتى ءىرى جارىقشاقسىز»، «قوپارۋسىز تەگىس»، «ءتۇسى سارىدان قوڭىرعا دەيىن»، «مياكيش پروپەچەننىي ەمەس»، «دىمقىل سەزىلەدى»، «ەلاستيچنىي» دەگەن سەكىلدى شالا قازاقشامەن مەممەكەمە بىزگە نە ايتپاق؟ پاۆلودار وبلىسىندا تەحنيكالىق سيپاتتامانى تازا مەملەكەتتىك تىلدە جازاتىن ءبىر مامان جوق پا؟
بۇل سۇراقتاردى پاۆلودار وبلىسىنىڭ اقپارات جانە قوعامدىق دامۋ باسقارماسىنا جولدادىق. باسقارما جاۋابى كەلىپ جاتسا، ونى دا جاريالايتىنىمىزدى ەسكەرتەمىز.
قانات بىرلىكۇلى
ادىرنا ۇلتتىق پورتالى
