وبلىس ورتالىعىنىڭ الپىس ءۇش وتباسى بىردەن قونىستاندى. ونىڭ ىشىندە 43 كوپبالالى وتباسى جانە 20 جەتىم بالا بار.
اقمولا وبلىسىنىڭ اكىمى مارات احمەتجانوۆ كوكشەتاۋلىقتاردى قونىس تويىمەن قۇتتىقتادى.
«ءوز ۇيىنە يە بولۋ - ءار وتباسى ءۇشىن، ءار ادام ءۇشىن ۇلكەن مەرەكە. ەل پرەزيدەنتى ءبىرىنشى كەزەكتە ازاماتتاردىڭ ءال-اۋقاتىن جانە تىرشىلىك ساپاسىن ارتتىرۋعا باعىتتالعان الەۋمەتتىك جوبالاردى ىسكە اسىرۋعا ەرەكشە نازار اۋدارادى. ماڭىزدى باعىتتاردىڭ ءبىرى - تۇرعىن ۇيمەن قامتاماسىز ەتۋ. بۇگىنگى وقيعا - قازاقستاندىقتاردىڭ ءومىر ءسۇرۋ ساپاسىن ارتتىرۋعا باعىتتالعان مەملەكەتتىك ساياساتتى ىسكە اسىرۋ جونىندەگى ناقتى شارا»، - دەپ اتاپ ءوتتى م.احمەتجانوۆ.
اعىمداعى جىلى وڭىردەگى حالىقتىڭ الەۋمەتتىك وسال توپتارىنىڭ ساناتىنا 840-قا جۋىق پاتەردى تاپسىرۋ جوسپارلانۋدا، ونىڭ ىشىندە 500-دەن استامى وبلىس ورتالىعىندا. بۇل ماقساتتارعا شامامەن 16 ملرد تەڭگە بيۋدجەت قاراجاتى ءبولىندى. تۇرعىن ءۇيدى ساتىپ الۋدىڭ جاڭا فورماتى كوپ بالالى وتباسىلاردىڭ، جەتىم بالالاردىڭ، مۇگەدەكتەردىڭ جانە باسقا دا ساناتتاعى بالالاردىڭ تۇرعىن ءۇي جاعدايلارىن جاقسارتۋعا، ەڭ باستىسى - كەزەكتى قىسقارتۋعا مۇمكىندىك بەرەدى.
سونداي-اق، كرەديتتىك تۇرعىن ءۇي الۋدىڭ مەملەكەتتىك تەتىكتەرى دە جۇمىس ىستەيدى. بارلىق مەملەكەتتىك باعدارلامالار بويىنشا 1500-گە جۋىق اقمولالىقتى جاڭا قونىسپەن قامتاماسىز ەتۋ جوسپارلانۋدا. كوپ بالالى انا، التىن القا يەگەرى گۇلميرا قوجاحمەتوۆا 2010 جىلدان بەرى كەزەكتە تۇر.
«مەن وتە قۋانىشتىمىن جانە ريزامىن. ءبىز بۇل ءساتتى 14 جىل كۇتتىك. ءبىزدىڭ جاڭا پاتەر وتە جايلى، جارىق جانە كەڭ. جاقىن جەردە مەكتەپ پەن بالاباقشا بار»، - دەدى كوكشەتاۋ تۇرعىنى.
ايتا كەتەيىك، وبلىستا جاڭا تۇرعىن ۇيلەردىڭ قۇرىلىسى قارقىن الۋدا. تەك سوڭعى جىلدارى ءوڭىردىڭ تۇرعىن ءۇي قۇرىلىسىنا 200 ملرد تەڭگەدەن استام ينۆەستيتسيا سالىندى، 2 ملن م2 جۋىق تۇرعىن ءۇي تاپسىرىلدى. ناتيجەسىندە 12 مىڭعا جۋىق اقمولالىق وتباسى وزدەرىنىڭ تۇرعىن ءۇي ماسەلەلەرىن شەشتى.
