بۇگىن، 13 ماۋسىمدا پرەزيدەنت قاسىم-جومارت توقاەۆتىڭ توراعالىعىمەن ءتۋريزمدى دامىتۋ جونىندەگى كەڭەس ءوتتى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
جيىنعا پرەمەر-مينيستر ولجاس بەكتەنوۆ, پرەزيدەنت اكىمشىلىگىنىڭ باسشىسى ايبەك دادەباي, باس پروكۋرور بەرىك اسىلوۆ, ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆ, ۇكىمەت مۇشەلەرى، استانانىڭ، رەسپۋبليكالىق ماڭىزى بار قالالار مەن وبلىستاردىڭ اكىمدەرى، ۇلتتىق كومپانيالار مەن «اتامەكەن» ۇلتتىق كاسىپكەرلەر پالاتاسىنىڭ جەتەكشىلەرى، تۋريزم سەكتورىنداعى بيزنەس قوعامداستىق وكىلدەرى قاتىستى.
مەملەكەت باسشىسى، ەڭ الدىمەن، تۋريزم الەمدىك ەكونوميكانىڭ قارقىندى دامۋىنا ىقپال ەتىپ وتىرعان ءارى ينۆەستورلار ءۇشىن تارتىمدى سالا ەكەنىن اتاپ ءوتتى.
– بۇگىندە الەمدىك جالپى ونىمدەگى ءتۋريزمنىڭ ۇلەسى 9 پايىزدان استى. ياعني، پاندەمياعا دەيىنگى دەڭگەيگە قايتا كەلدى دەۋگە بولادى. دۇنيەجۇزىندەگى جۇمىس ورىندارىنىڭ شامامەن 10 پايىزى تۋريزمگە تيەسىلى. ءاربىر ءتورتىنشى جۇمىس ورنى وسى سالادا اشىلىپ جاتىر. كورسەتىلەتىن قىزمەتتەر بويىنشا الەمدىك ەكسپورتتىڭ 30 پايىزى، ينۆەستيتسيانىڭ 7 پايىزى جانە سالىق تۇسىمدەرىنىڭ 5 پايىزى تۋريزم ارقىلى تۇسەدى. قازاقستاندا ءتۋريزمنىڭ بارلىق ءتۇرىن دامىتۋعا مول مۇمكىندىك بار، ەكولوگيالىق تۋريزمنەن باستاپ بيزنەس تۋريزمىنە دەيىن دامىتۋعا بولادى، – دەدى ول.
مەملەكەت باسشىسى ەلىمىزدىڭ گەوگرافيالىق تۇرعىدان وڭتايلى ورنالاسقانىنا، الۋان ءتۇرلى تابيعاتىمىز، باي ءارى بىرەگەي تاريحي-مادەني مۇرامىز بار ەكەنىنە قاراماستان، تۋريزم سالاسىنداعى الەۋەتتىڭ تولىق پايدالانىلماي وتىرعانىن سىنعا الدى.
– ەكونوميكانىڭ ماڭىزدى سالاسى سانالاتىن تۋريزم ازىرگە ءتيىمدى بولماي تۇر. بۇل – ۇكىمەت پەن اكىمدىكتەردىڭ جىبەرگەن كەمشىلىگى. سوڭعى ءتورت جىلدا ەكونوميكا قۇرىلىمىنداعى ءتۋريزمنىڭ ۇلەسى 3,7 پايىزدان 3,2 پايىزعا دەيىن ازايىپ كەتتى. بۇل الەمدەگى ورتاشا كورسەتكىشتەن ءۇش ەسە تومەن. بۇعان قوسا، اتالعان كورسەتكىش بويىنشا ءبىز كليماتى مەن مادەنيەتى ۇقساس كورشى ەلدەرگە دە ەسە جىبەرىپ وتىرمىز. تۋريزم سالاسى قارقىندى تۇردە دامۋ ءۇشىن شۇعىل ءارى جۇيەلى شارالار قابىلداۋ قاجەت ەكەنى انىق، – دەدى قاسىم-جومارت توقاەۆ.
