Búgin, 13 maýsymda Prezıdent Qasym-Jomart Toqaevtyń tóraǵalyǵymen týrızmdi damytý jónindegi keńes ótti, dep habarlaıdy «Adyrna» tilshisi Aqordaǵa silteme jasap.
Jıynǵa Premer-Mınıstr Oljas Bektenov, Prezıdent Ákimshiliginiń Basshysy Aıbek Dádebaı, Bas prokýror Berik Asylov, Ulttyq qaýipsizdik komıtetiniń tóraǵasy Ermek Saǵymbaev, Úkimet músheleri, Astananyń, respýblıkalyq mańyzy bar qalalar men oblystardyń ákimderi, ulttyq kompanııalar men «Atameken» ulttyq kásipkerler palatasynyń jetekshileri, týrızm sektoryndaǵy bıznes qoǵamdastyq ókilderi qatysty.
Memleket basshysy, eń aldymen, týrızm álemdik ekonomıkanyń qarqyndy damýyna yqpal etip otyrǵan ári ınvestorlar úshin tartymdy sala ekenin atap ótti.
– Búginde álemdik jalpy ónimdegi týrızmniń úlesi 9 paıyzdan asty. Iaǵnı, pandemııaǵa deıingi deńgeıge qaıta keldi deýge bolady. Dúnıejúzindegi jumys oryndarynyń shamamen 10 paıyzy týrızmge tıesili. Árbir tórtinshi jumys orny osy salada ashylyp jatyr. Kórsetiletin qyzmetter boıynsha álemdik eksporttyń 30 paıyzy, ınvestıııanyń 7 paıyzy jáne salyq túsimderiniń 5 paıyzy týrızm arqyly túsedi. Qazaqstanda týrızmniń barlyq túrin damytýǵa mol múmkindik bar, ekologııalyq týrızmnen bastap bıznes týrızmine deıin damytýǵa bolady, – dedi ol.
Memleket basshysy elimizdiń geografııalyq turǵydan ońtaıly ornalasqanyna, alýan túrli tabıǵatymyz, baı ári biregeı tarıhı-mádenı muramyz bar ekenine qaramastan, týrızm salasyndaǵy áleýettiń tolyq paıdalanylmaı otyrǵanyn synǵa aldy.
– Ekonomıkanyń mańyzdy salasy sanalatyn týrızm ázirge tıimdi bolmaı tur. Bul – Úkimet pen ákimdikterdiń jibergen kemshiligi. Sońǵy tórt jylda ekonomıka qurylymyndaǵy týrızmniń úlesi 3,7 paıyzdan 3,2 paıyzǵa deıin azaıyp ketti. Bul álemdegi ortasha kórsetkishten úsh ese tómen. Buǵan qosa, atalǵan kórsetkish boıynsha biz klımaty men mádenıeti uqsas kórshi elderge de ese jiberip otyrmyz. Týrızm salasy qarqyndy túrde damý úshin shuǵyl ári júıeli sharalar qabyldaý qajet ekeni anyq, – dedi Qasym-Jomart Toqaev.
