گەرمانيادا سۋديا ءىز-ءتۇزسىز جوعالىپ كەتكەن بولاتىن. جوعالعان قازاق قىزى تۋرالى ونىڭ اعاسى تىڭ دەرەك تاپتى.
“قارىنداسىم جوعالىپ كەتكەننەن كەيىن مەن ونىڭ قۇربىلارىمەن تىلدەسىپ، قارىنداسىمنىڭ قالاي قينالعانىن، كۇيەۋى وعان تۇرلى فيزيكالىق جانە پسيحولوگيالىق قىسىمعا كورسەتكەنىن ەستىدىم. كۇيەۋىنىڭ تۋىستارى، اسىرەسە ەنەسى كۇن بەرمەگەن كورىنەدى. گەماتومالارى، سوققى الىپ، دەنەسى كوگەرگەن، سىرىلعان، قۇلاقتارى ىسىنگەن فوتولارى بار. سوڭعى ايدا ول ۆيدەوقوڭىراۋعا شىقپادى”، – دەدى ايگۇل سايلىباەۆانىڭ اعاسى قانات سايلىباەۆ.
قازاقستاندىق ايگۇل سايلىباەۆا 2020 جىلى كۇيەۋىمەن بىرگە ەلدەن كەتكەن ەدى. ولار ءارتۇرلى ەلدەردە تۇرعان، سوڭعىسى – گەرمانيانىڭ بەنسحايم قالاسى بولعانى انىقتالدى. ايەلدىڭ كۇيەۋى قۇقىق قورعاۋ ورگاندارىنا ولاردىڭ ناقتى تۇرعىلىقتى مەكەنجايىن ايتقىسى كەلمەگەن ەكەن.
سونداي-اق ايەلدىڭ تۋىستارىمەن سوڭعى رەت 3 ماۋسىمدا حابارلاسقانى بەلگىلى بولدى.
“جەرگىلىكتى پوليتسيا قىزمەتكەرلەرىمەن اڭگىمەلەسىپ، ولار مۇقيات ىزدەيتىندەرىن ايتتى. سوعان قاراماستان بەرليندەگى باس كونسۋلدىعىمىز بەن ەلشىلىگىمىز بۇل ماسەلەنى ەرەكشە باقىلاۋدا ۇستاۋ ءۇشىن گەرمانيانىڭ سىرتقى ىستەر مينيسترلىگىنە ءتيىستى ۇندەۋ جولدادى. قازىر نەمىس تاراپىمەن بىرلەسە وتىرىپ، قازاقستانداعى تۋىستارىنا ۆيزا الۋ ماسەلەسىن پىسىقتاپ جاتىرمىز”، – دەپ مالىمدەدى ءسىم رەسمي وكىلى ايبەك سمادياروۆ.
