بۇگىن «AMANAT» پارتياسى اۋقىمدى ەكولوگيالىق اكتسيا – «تازا قازاقستان» Road-ەستافەتاسىن باستادى. وسى اپتادا پارتيانىڭ جۇزدەگەن بەلسەندىسى مەن «جاستار رۋحى» جاستار قاناتىنىڭ ۆولونتەرلەرى «استانا – الماتى» تاس جولى بويىنىڭ اۋماعىن تازارتادى.
ءىس-شاراعا «AMANAT» پارتياسىنىڭ اتقارۋشى حاتشىسى داۋلەت كارىبەك, ەكولوگيا جانە تابيعي رەسۋرستار ءمينيسترى ەرلان نىسانباەۆ, قازاقستاننىڭ قايتالاما شيكىزاتتى قايتا وڭدەۋشىلەر قاۋىمداستىعىنىڭ باسقارما توراعاسى باتىربەك اۋباكىروۆ جانە ءماجىلىس دەپۋتاتتارى قاتىستى.
اكتسيا اياسىندا بەلسەندىلەر مەن ۆولونتەرلەر جول بويىندا، سونداي-اق جولعا ىرگەلەس اۆتوتۇراقتار مەن كەمپينگتەر اۋماعىندا تازالىق جۇمىسىن جۇرگىزەدى. تازالىق جۇمىسى كۆادروكوپتەرلەردى پايدالانا وتىرىپ، اۋەدەن بارلاۋ دەرەكتەرى نەگىزىندە جۇزەگە اسىرىلادى. جينالعان قوقىس پوليگوندارعا جەتكىزىلەدى.
«تازا قازاقستان» وزىمىزدەن باستالادى. ەلىمىز ەڭ الدىمەن ءوز وتانداستارىمىز ءۇشىن تازا ءارى جايلى بولۋى كەرەك. سوندىقتان مەملەكەت باسشىسى بۇل ماسەلەنى جالپىۇلتتىق دەڭگەيگە كوتەردى. تازالىق پەن ءتارتىپ – ءومىر ءسۇرۋ نورماسىنا اينالۋعا ءتيىس. «تازا قازاقستان» Road-ەستافەتاسى تاس جولدارداعى قوقىس ماسەلەسىن شەشىپ قانا قويماي، قوعامدى بىرىكتىرەدى، ەكولوگيالىق مادەنيەت پەن سانا قالىپتاستىرادى»، – دەدى «AMANAT» پارتياسىنىڭ اتقارۋشى حاتشىسى داۋلەت كارىبەك.
وسىلايشا، اپتا ىشىندە پارتيا بەلسەندىلەرى مەن «جاستار رۋحى» جاستار قاناتىنىڭ ۆولونتەرلەرى اقمولا، قاراعاندى، جامبىل جانە الماتى وبلىستارى ارقىلى وتەتىن ۇزىندىعى 1200 شاقىرىمنان استام تاس جولدى تازالايدى.
Road-ەستافەتا ەكولوگيا جانە تابيعي رەسۋرستار مينيسترلىگى مەن «جاسىل دامۋ» اق قولداۋىمەن وتۋدە. ءوز كەزەگىندە، قازاقستاننىڭ قايتالاما شيكىزاتتى قايتا وڭدەۋشىلەر قاۋىمداستىعى قوقىستى تاسىمالداۋعا قاجەت جۇك كولىكتەرىن ۇسىندى.
ءىس-شاراعا «1 كوماندا – 1 وبلىس» قاعيداتى بويىنشا قۇرىلعان كوماندالار قاتىسادى. كوماندالاردىڭ قۇرامىنا ءماجىلىس جانە ءماسليحات دەپۋتاتتارى كىرەدى. سونداي-اق ولار ءىرى ەلدى مەكەندەردە جاستار قاۋىمىمەن جۇزدەسىپ، ازاماتتارمەن قوعامدىق قابىلداۋ وتكىزەدى. Road-ەستافەتانىڭ جابىلۋ سالتاناتى قوناەۆ قالاسىندا ۇيىمداستىرىلادى.
ەسكە سالا كەتەيىك، بۇعان دەيىن «AMANAT» پارتياسى پرەزيدەنتتىڭ «تازا قازاقستان» جالپىۇلتتىق باستاماسى اياسىندا ءار اپتا سايىن وتكىزىلەتىن «تازا بەيسەنبى» ەكولوگيالىق اكتسياسىن باستاعان بولاتىن. ەلدى مەكەندەردەگى لاستانعان اۋماقتاردىڭ كارتاسى ازىرلەندى. سونىڭ نەگىزىندە ەلىمىزدەگى جول بويىنداعى اۋماقتاردان، ونەركاسىپتىك ايماقتاردان، تۇرعىن اۋدانداردان، الەۋمەتتىك نىسانداردان جانە باسقا دا كوپتەگەن اۋماقتاردان 475 ۋچاسكە انىقتالدى.
ايتا كەتەيىك، سۋ تاسقىنىنىڭ قاۋىپتى كەزەڭى اياقتالعاننان كەيىن «AMANAT» پارتياسىنىڭ 4 مىڭعا جۋىق بەلسەندىسى مەن «جاستار رۋحى» جاستار قاناتىنىڭ ۆولونتەرلەرى قارعىن سۋدان زارداپ شەككەن تۇرعىنداردىڭ باسپاناسىن رەتكە كەلتىرۋگە كومەكتەستى. ەلىمىزدىڭ بارلىق وڭىرىندەگى بارشا پارتيالىقتار ساياباقتاردى، سكۆەرلەردى، اۋلالاردى تازارتىپ، تاريحي-مادەني جانە تابيعي ەسكەرتكىشتەردى تازالاۋدا. سونداي-اق سەنبىلىككە شىعىپ، اعاش ەگەدى جانە وزگە دە ءىس-شارالاردى ۇيىمداستىرادى. ماسەلەن، 27 ساۋىردە، ياعني نەبارى ءبىر كۇندە ەل اۋماعىندا پارتيالىقتار 55 مىڭ ءتۇپ اعاش ەكتى.
سونداي-اق، ەكولوگيالىق ماسەلەلەردى شەشۋ – «AMANAT» پارتياسىنىڭ سايلاۋالدى باعدارلاماسىندا قامتىلعان ماڭىزدى باسىمدىقتىڭ ءبىرى. سايلاۋالدى ۋادەلەردى جۇيەلى جۇزەگە اسىرۋ جۇمىسى اياسىندا بىلتىر مەملەكەتتىك ورمان قورى اۋماعىنا 302,7 ملن ءتۇپ اعاش ەگىلدى. سونىمەن قاتار، 39 ءىرى ونەركاسىپتىك كاسىپورىندا اۋانى لاستاۋىن باقىلايتىن اۆتوماتتاندىرىلعان جۇيە ورناتىلدى.
2027 جىلعا قاراي پارتيانىڭ سايلاۋالدى باعدارلاماسى اياسىندا تۇرمىستىق قاتتى قالدىقتاردى قايتا وڭدەۋ جانە كادەگە جاراتۋ ۇلەسىن 36%-عا دەيىن ۇلعايتۋ، جايىق وزەنىنىڭ ەكوجۇيەسىن قالپىنا كەلتىرۋ، بالقاش كولىنە تۇراقتى سۋ اعىنىن قامتاماسىز ەتۋ، اۋا ساپاسىنىڭ يندەكسىن ەنگىزۋ، لاستانعان ەلدى مەكەندە كاسىپورىننىڭ اۋانى لاستاۋ نورماتيۆتەرىن 40%-عا دەيىن تومەندەتۋ، سونداي-اق جۇمىس ىستەپ تۇرعان 16 سۋ قويماسىن قايتا جاڭارتۋ جانە جاڭادان 14 سۋ قويماسىن تۇرعىزۋ جوسپارلانۋدا.
