Búgin «AMANAT» partııasy aýqymdy ekologııalyq akııa – «Taza Qazaqstan» Road-estafetasyn bastady. Osy aptada partııanyń júzdegen belsendisi men «Jastar Rýhy» jastar qanatynyń volonterleri «Astana – Almaty» tas joly boıynyń aýmaǵyn tazartady.
Is-sharaǵa «AMANAT» partııasynyń Atqarýshy hatshysy Dáýlet Káribek, Ekologııa jáne tabıǵı resýrstar mınıstri Erlan Nysanbaev, Qazaqstannyń qaıtalama shıkizatty qaıta óńdeýshiler qaýymdastyǵynyń basqarma tóraǵasy Batyrbek Áýbákirov jáne Májilis depýtattary qatysty.
Akııa aıasynda belsendiler men volonterler jol boıynda, sondaı-aq jolǵa irgeles avtoturaqtar men kempıngter aýmaǵynda tazalyq jumysyn júrgizedi. Tazalyq jumysy kvadrokopterlerdi paıdalana otyryp, áýeden barlaý derekteri negizinde júzege asyrylady. Jınalǵan qoqys polıgondarǵa jetkiziledi.
«Taza Qazaqstan» ózimizden bastalady. Elimiz eń aldymen óz otandastarymyz úshin taza ári jaıly bolýy kerek. Sondyqtan Memleket basshysy bul máseleni jalpyulttyq deńgeıge kóterdi. Tazalyq pen tártip – ómir súrý normasyna aınalýǵa tıis. «Taza Qazaqstan» Road-estafetasy tas joldardaǵy qoqys máselesin sheship qana qoımaı, qoǵamdy biriktiredi, ekologııalyq mádenıet pen sana qalyptastyrady», – dedi «AMANAT» partııasynyń Atqarýshy hatshysy Dáýlet Káribek.
Osylaısha, apta ishinde partııa belsendileri men «Jastar Rýhy» jastar qanatynyń volonterleri Aqmola, Qaraǵandy, Jambyl jáne Almaty oblystary arqyly ótetin uzyndyǵy 1200 shaqyrymnan astam tas joldy tazalaıdy.
Road-estafeta Ekologııa jáne tabıǵı resýrstar mınıstrligi men «Jasyl damý» AQ qoldaýymen ótýde. Óz kezeginde, Qazaqstannyń qaıtalama shıkizatty qaıta óńdeýshiler qaýymdastyǵy qoqysty tasymaldaýǵa qajet júk kólikterin usyndy.
Is-sharaǵa «1 komanda – 1 oblys» qaǵıdaty boıynsha qurylǵan komandalar qatysady. Komandalardyń quramyna Májilis jáne máslıhat depýtattary kiredi. Sondaı-aq olar iri eldi mekenderde jastar qaýymymen júzdesip, azamattarmen qoǵamdyq qabyldaý ótkizedi. Road-estafetanyń jabylý saltanaty Qonaev qalasynda uıymdastyrylady.
Eske sala keteıik, buǵan deıin «AMANAT» partııasy Prezıdenttiń «Taza Qazaqstan» jalpyulttyq bastamasy aıasynda ár apta saıyn ótkiziletin «Taza beısenbi» ekologııalyq akııasyn bastaǵan bolatyn. Eldi mekenderdegi lastanǵan aýmaqtardyń kartasy ázirlendi. Sonyń negizinde elimizdegi jol boıyndaǵy aýmaqtardan, ónerkásiptik aımaqtardan, turǵyn aýdandardan, áleýmettik nysandardan jáne basqa da kóptegen aýmaqtardan 475 ýchaske anyqtaldy.
Aıta keteıik, sý tasqynynyń qaýipti kezeńi aıaqtalǵannan keıin «AMANAT» partııasynyń 4 myńǵa jýyq belsendisi men «Jastar Rýhy» jastar qanatynyń volonterleri qarǵyn sýdan zardap shekken turǵyndardyń baspanasyn retke keltirýge kómektesti. Elimizdiń barlyq óńirindegi barsha partııalyqtar saıabaqtardy, skverlerdi, aýlalardy tazartyp, tarıhı-mádenı jáne tabıǵı eskertkishterdi tazalaýda. Sondaı-aq senbilikke shyǵyp, aǵash egedi jáne ózge de is-sharalardy uıymdastyrady. Máselen, 27 sáýirde, ıaǵnı nebári bir kúnde el aýmaǵynda partııalyqtar 55 myń túp aǵash ekti.
Sondaı-aq, ekologııalyq máselelerdi sheshý – «AMANAT» partııasynyń saılaýaldy baǵdarlamasynda qamtylǵan mańyzdy basymdyqtyń biri. Saılaýaldy ýádelerdi júıeli júzege asyrý jumysy aıasynda byltyr memlekettik orman qory aýmaǵyna 302,7 mln túp aǵash egildi. Sonymen qatar, 39 iri ónerkásiptik kásiporynda aýany lastaýyn baqylaıtyn avtomattandyrylǵan júıe ornatyldy.
2027 jylǵa qaraı partııanyń saılaýaldy baǵdarlamasy aıasynda turmystyq qatty qaldyqtardy qaıta óńdeý jáne kádege jaratý úlesin 36%-ǵa deıin ulǵaıtý, Jaıyq ózeniniń ekojúıesin qalpyna keltirý, Balqash kóline turaqty sý aǵynyn qamtamasyz etý, aýa sapasynyń ındeksin engizý, lastanǵan eldi mekende kásiporynnyń aýany lastaý normatıvterin 40%-ǵa deıin tómendetý, sondaı-aq jumys istep turǵan 16 sý qoımasyn qaıta jańartý jáne jańadan 14 sý qoımasyn turǵyzý josparlanýda.