جامبىل وبلىسىندا اسكەردە تاعى دا الىمجەتتىك ورىن الدى. ءوز ەركىمەن 17 مامىردا اسكەرگە اتتانعان سارباز نۇرجىگىت اسانۇلى جانساقتاۋ بولىمىنە تۇسكەن. بۇل تۋرالى “ادىرنا” ۇلتتىق پورتالىنا نۇرجىگىتتىڭ اناسى جانالينا جاننا حابارلاسىپ، ايتىپ بەردى.
قوستانايدىڭ تۋماسى 19 جاستاعى ءابدىپاتتا نۇرجىگىت اسانۇلى ءوز ەركىمەن 17 مامىردا جامبىل وبلىسى قورداي اۋدانى وتار قالاشىعىنداعى 30212 اسكەري بولىمىنە قابىلدانعان. سودان بەرى ءبىر اي وتپەي ساربازعا كىشى سەرجانت ءتيىسىپ، 6 ماۋسىم كۇنى اۋرۋحاناعا تۇسكەن. قازىر جانساقتاۋ بولىمىندە.
اسكەرگە ساپ-ساۋ كەتكەن جالعىز ۇلىنىڭ اۋرۋحاناعا تۇسكەنىن اناسى تەك 9 ماۋسىم كۇنى ەستىگەن.
“9 ماۋسىم كۇنى ساعات 16:30 شاماسىندا حابارلاسىپ، بالامنىڭ قوردايدىڭ ورتالىق اۋرۋحاناسىنا اۋىر جاعدايمەن جەتكىزىلىپ، جانساقتاۋ بولىمىنە تۇسكەنىن ايتتى. بالام قازىر يبل اپپاراتىنا قوسىلعان، ەس-ءتۇسسىز جاتىر. العاشىندا اسكەري ەمحانالارىنا ءوز اياعىمەن كەلگەن. سول كەزدە قابىلداعان دارىگەرگە كىشى سەرجانت تۇرلان داستان ۇرعانىن ايتقان. ىشتەن ۇرعان سوڭ، ءىشى اۋىرىپ، دارىگەرلەرىنە ءدارى سۇراپ بارعان. سوسىن جاعدايى ناشارلاپ ورتالىق اۋرۋحاناعا جونەلتىلگەن”، - دەيدى اناسى.
اسكەري ەمحانا نۇرجىگىتكە وڭ جاق وكپەنىڭ جوعارى جانە ورتاڭعى بولىكتىك پنەۆمونياسى دەگەن دياگنوز قويعان. جاعدايى جەدەل ناشارلاۋىنا بايلانىستى جەدەل-جاردەم شاقىرىلىپ، قورداي اۋداندىق كوپبەيىندى اۋرۋحاناسىنا جونەلتكەن. الايدا، اناسى بۇل دياگنوزبەن كەلىسپەيتىنىن ايتادى.
19 جاستاعى نۇرجىگىتتىڭ اناسى بۇل ءىستىڭ جىلى جابىلىپ قالماۋىن سۇرايدى. قيانات جاساعانداردى زاڭ الدىندا جاۋاپقا تارتۋعا نيەتتى.
“29 ماۋسىم كۇنى انت قابىلداۋ كەرەك ەدى. 1 اي دا بولعان جوق. بۇل ءىستىڭ جىلى جابىلىپ قالماۋىن سۇرايمىن. ارىز جازىلدى. وسى ءىستىڭ باستى نازاردا ۇستاپ، تەرگەۋ جۇرگىزىلۋىن تالاپ ەتەمىن. بارماق باستى، كوز قىستى بولىپ قالماسىن ”، دەيدى اناسى.
قۇقىق قورعاۋ ورگاندارى قىلمىستىقتىق كودەكستىڭ 451 بابى 1 ءبولىمى بويىنشا قىلمىستىق ءىس قوزعالعانىن ايتادى. قازىر تەرگەۋ جۇرگىزىلۋدە.
