«ەل دامۋىنىڭ نەگىزى – تۇراقتىلىق پەن بىرلىكتە» وسىنداي اتاۋمەن قازاقستان حالقى اسسامبلەياسىنىڭ كەزەكتى سەسسياسى ءوتتى.
سەسسيا وتىرىسىندا اقمولا وبلىسىنىڭ اكىمى مارات احمەتجانوۆ، قوعامدىق بىرلەستىكتەردىڭ باسشىلارى، زيالى قاۋىم وكىلدەرى، قحا مۇشەلەرى مەن جاستار قاناتى قاتىستى.
جيىندا العاشقى بوپ ءسوز سويلەگەن وبلىس اكىمى مارات احمەتجانوۆ، مەملەكەت باسشىسى اسسامبلەيانىڭ ەلدىڭ ساياسي جاڭعىرۋى مەن جالپىۇلتتىق تۇتاستىعىن نىعايتۋعا قوسقان ۇلەسىنە جوعارى باعا بەرگەنىن ايتا كەلىپ، بارلىق ەتنوس وكىلدەرىن مەملەكەت دامۋىنىڭ ستراتەگيالىق مىندەتتەرىن بىرلەسىپ شەشۋگە شاقىردى.
«بۇگىندە بارلىق سالالاردىڭ جۇمىسىن ۇلتتىق قۇرىلتايدىڭ ءۇشىنشى وتىرىسىندا بەلگىلەنگەن نەگىزگى قۇندىلىقتارعا ۇيلەستىرۋ قاجەت. مەملەكەتتىك ورگاندار مەن جۇرتشىلىق ازاماتتىق بىرەگەيلىكتى نىعايتۋعا باعىتتالۋى ءتيىس. اسسامبلەيا مۇشەلەرى جاستاردى يدەولوگيالىق تاربيەلەۋ، بەس الەۋمەتتىك جاماندىققا قارسى تۇرۋ ماسەلەلەرىنە كوپ كوڭىل ءبولۋى كەرەك»، - دەدى م.احمەتجانوۆ.
سونداي-اق، سۋ تاسقىنىنان زارداپ شەككەندەرگە قحا قۇرىلىمى مەن ەتنومادەني بىرلەستىكتەردىڭ 300 وكىلى ءبىر كىسىدەي ات سالىسىپ، كومەك قولىن سوزدى. ولاردىڭ سۋ تاسقىنىنا قارسى جۇمىستارىنا قوسقان ۇلەسى جيىندا ەرەكشە اتالىپ ءوتتى.
ءىس-شارا بارىسىندا «سانگي-كابۋد» تاجىك مادەني ورتالىعىنىڭ توراعاسى، ۆولونتەرلىك ورتالىقتىڭ باسشىسى ومار شونازاروۆ، وبلىستىق جاستار رەسۋرستىق ورتالىعىنىڭ باسشىسى داستان ەرمەكوۆ، اقمولا قحا جانىنداعى عىلىمي-ساراپتامالىق توپتىڭ توراعاسى مارات وتەگەنوۆ، اقكول اۋدانىنداعى بالالار مۋزىكا مەكتەبىنىڭ وقىتۋشىسى زەنتا تسوي ءسوز سويلەدى.
قاتىسۋشىلار مەملەكەتتىك ءتىلدى ۇيرەنۋ، قحا جاستار قاناتىنىڭ قىزىقتى جوبالارىن ىسكە اسىرۋ جانە تاعى باسقا ماسەلەلەردى تالقىلادى.
سەسسيا اياسىندا وبلىستىق قوعامدىق كەلىسىم مەن جالپىۇلتتىق بىرلىكتى نىعايتۋعا ەلەۋلى ۇلەس قوسقان بىرقاتار ازاماتتار ماراپاتتالدى.
ەستەرىڭىزگە سالا كەتەيىك، قازاقستان رەسپۋبليكاسى پرەزيدەنتىنىڭ جارلىعىمەن بەيبىتشىلىكتى، حالىقتار اراسىنداعى دوستىق پەن ىنتىماقتاستىقتى نىعايتۋداعى، سونداي-اق مەملەكەتتىك ءتىلدى دامىتۋداعى قىزمەتى ءۇشىن قازاقستان حالقى اسسامبلەياسىنىڭ مۇشەسى، كوكشەتاۋ قۇرىلىس-تەحنولوگيالىق كوللەدجىنىڭ وقىتۋشىسى الەنا مالكوۆا-سولوپوۆا «شاپاعات» مەدالىمەن ماراپاتتالدى.
قازاقستان حالقى اسسامبلەياسى قىزمەتىنىڭ ماڭىزدى باعىتى ۇلتارالىق كەلىسىم مەن ىشكى ساياسي تۇراقتىلىقتى ساقتاۋ جانە نىعايتۋ ەكەنىن اتاپ وتكەن ءوڭىر باسشىسى سەسسيا سوڭىندا مەملەكەتتىك ورگاندارعا «اقمولا وبلىسى قازاقستان حالقى اسسامبلەياسىنىڭ» 2022-2026 جىلدارعا ارنالعان دامۋ تۇجىرىمداماسىن جۇزەگە اسىرۋ بويىنشا جۇمىستى جالعاستىرۋعا، ەتنومادەني بىرلەستىكتەردىڭ جۇمىسىن جانداندىرۋعا باعىتتالعان بىرقاتار تاپسىرمالار بەردى.
